Дагъустан Республикадин Кьилин ва Гьукуматдин Администрациядин пресс-къуллугъди хабар гайивал, Владимир Васильева бязи ведомствойрин къуллугърал цIийи ксар тайинарна.
ИкI, региондин руководителдин Указдалди РД-дин Гьукуматдин Председателдин заместителвиле (везифаяр вахтуналди тамамарзава) Хайруллин Инсаф Рашитович тайинарна. Ада Казандин госуниверситетдин юридический факультет ва а шегьерда финансринни экономикадин госинститут акьалтIарна. Жуьреба-жуьре йисара ада Татарстан Республикадин экономикадин ва промышленностдин министрдин заместителвиле, Татарстандин президентдин къвалав гвай государственный яшайишдин кIвалерин фондунин исполнительный директордин сад лагьай заместителвиле кIвалахна. Хайруллин экономикадин илимрин кандидат я. Идалай гъейри, ам “Татарстан Республикадин эцигунардайбурун Союз” региональный объединенидин вице-президентни я.
Дагъустан Республикадин Кьилин советниквиле виликдай РД-дин хуьруьн майишатдин ва суьрсетдин министрдин сад лагьай заместитель хьайи Адильхан Ганакаев тайинарнава. Министерствода адан чка ДГУНХ-дин экономикадин кафедрадин профессор, экономикадин илимрин доктор Шарип Шарипова кьуна.
Дагъустан Республикадин гражданский оборонадин, кьетIен гьаларин ва тIебиатдин бедбахтвилин нетижаяр терг авунин крарин рекьяй министрдин заместителвиле — Эльдар Атаев, РД-дин архитектурадин ва шегьерар эцигунин рекьяй Комитетдин председателдин заместителвиле Мурат Шираев тайинарна.
Контрактдин вахт куьтягь хьунихъ галаз алакъалу яз РД-дин хуьруьн майишатдин ва суьрсетдин министрдин заместитель — статс-секретарь Шамил Алиев къуллугъдикай азадна. РД-дин предпринимателрин ва инвестицийрин рекьяй агентстводин руководителдин заместитель Мегьамед Мусаев вичин хушуналди алай къуллугъдилай элячIна.
«Лезги газет»
