Алатай гьафтеда Дагъустан Республикадин къенепатан крарин министрдин везифаяр вахтуналди тамамарзавай полициядин генерал-майор Дмитрий Гутыря, МВД-дин полициядин подразделенийрин регьберрихъ галаз Сулейман-Стальский райондиз мугьман хьана. Ам райактивдихъ ва хуьрерин агьалийрихъ галаз гуьруьшмиш хьана. Гуьруьшда райондин кьил Нариман Абдулмуталибова, Россиядин МВД-дин Дагъустан Республикада авай штабдин начальник Марат Макатова, райондин прокурор Фаргьад Акимова, райсуддин председатель Алирза Девлетханова, силисдин комитетдин районрин уртах отделдин регьбер Девлетхан Оружева, УФСБ-дин Дербент шегьерда авай 4-отделдин регьбер Мадрид Мегьамедова иштиракна.
Мярекат ачухай Н.Абдулмуталибова мугьманар СтIал Сулейманан чилел тебрикна, кIватI хьанвайбур абурухъ галаз танишарна.
— Эхиримжи йисара районда гьалар секинзава, — лагьана Н.Абдулмуталибова. — Чи районэгьлияр законриз муьтIуьгъбур я. Район яшайишдинни экономикадин месэлаяр гьялунин, аваданламишунин рекье ава, милли проектар уьмуьрдиз кечирмишзава, инвестицияр желб авунин, налогар кIватIунин рекьерайни еке кIвалах тухузва. Районди ислягьвал, секинвал хуьн — им чи вилик акъвазнавай эвелимжи везифа я. Законар чIурунин вилик пад кьун патални кIвалах тухузва. Вилик кумай, агакь тавунвай месэлаярни чна къайдаяр хуьдай органрихъ галаз санал гьялзава.
— Чун Сулейман-Стальский райондиз агьалийрихъ галаз гуьруьшмиш жез инин къенепатан крарин отделдин кIвалахдикай куь фикирар чириз атанва. Гуьруьш кьве патазни менфят жедайвал тухуз кIанзава. Чун квехъ, аваз хьайитIа, арзайрихъ яб акализ гьазур я, — лагьана Д.Гутыряди.
Гуьруьшдал райотделди 2019-йисуз тухвай кIвалахдикай анин начальник, полициядин подполковник Играм Османова доклад авуна.
Гуьгъуьнлай агьалийри суалар гана. ИкI, Курхуьрелай тир Замир Шайдаева Д.Гутырядиз вичив ДПС-дин работникар эдебсуз къайдада эгечIунин гьакъиндай арза авуна. Генерал-майорди и кар ахтармишун ДПС-дин жавабдар къуллугъчидал тапшурмишна, и месэла вичин гуьзчивилик жедайди къейдна.
Агъа СтIалрин хуьруьн администрациядин пешекар Энвер Мирзебегова районда ОМВД-дин типовой къайдадин цIийи дарамат эцигунин месэла къарагъарна. Ада лагьайвал, хуьруьн администрацияди цIийи дарамат эцигун патал 1,4 гектар чилин участок чара авунва, амма эцигунин кIвалахар кьулухъ язава.
Д.Гутыряди къейд авурвал, районда къенепатан крарин отделдиз типовой къайдадин цIийи дарамат эцигун Россиядин МВД-дин гуьзчивилик ква. Алай йисуз и проектдиз пул ахъаюн гуьзлемишзава.
Гуьруьшдин сергьятра аваз Д.Гутыряди къуллугъдин везифаяр намуслудаказ кьилиз акъудзавай полициядин работникрин диде-бубаяр тир Шиират Хановадив, Насият Катаевадив, Заноза Саидовадив ва Абдул Насрулаевав МВД-дин чухсагъулдин чарар вахкана.
Хазран Кьасумов
