Ватандин ЧIехи дяведин цIун ялав галукь тавур хуьр, кIвал виринра, гьакI чи ЯркIи дереда бажагьат ава. Зи хайи хуьр ЦицIигъарни гьахьтинбурукай сад я.
Хуьряй фронтдиз фейи 81 касдикай анжах 23-даз элкъвена хайи ерийрал хтун кьисмет хьана.
Гьахьтинбурукай сад Азизов Абдулазиз Абдулазизович тир. Ам 1920-йисуз лежбердин хизанда дидедиз хьана. Сифте ЦицIигъа, ахпа Рухунрин хуьре 7-классдал кьван кIелна.
1940-йисуз Азизоваз Кьасумхуьруьн комиссариатди Яру Армиядиз эвер гана. Ада гьа вахтунда Финляндиядихъ галаз хьайи дяведа иштиракай частара къулугъна.
Советрин уьлкведал Гитлеран Германияди вегьейла, Азизова къуллугъзавай кьушунар Москвадинни Ленинграддин сергьятар душмандикай хуьн патал ракъурна.
Ленинград шегьер гьалкъада гьатай йикъалай Азизова фашистрихъ галаз женг чIугуна. 1943-йисуз женгера адал хьайи хирер, (сифте — гъилел, ахпани — кIвачел), себеб яз, аскер госпиталдиз аватна. КIвач, метIелай агъуз сагъ жедай гьалда амачиз акуна, атIана.
Абдулазизан дяведин йикъар гьа иналди куьтягь хьана. Дяведин йисара къалурай кьегьалвилерай ам Яру Гъетрен ордендиз, “Карелия азад авунай”, “Ленинград азад авунай” медалриз лайихлу хьана.
1943-йисан гатуз хайи хуьруьз хтайдалай гуьгъуьниз Азизов Абдулазиза, Хунзах райондиз фена, гьана ветеринарный духтурвилин курсара кIелна ва вичиз хуьруьн майишатдин пеше къачуна. Ватандин ЧIехи дяведин иштиракчиди “2-пятилетка” тIвар алай колхозда маларин духтур, ахпа фермадин заведующий, гуьгъуьнлай складчи яз кIвалахна.
1966-йисуз, залзала себеб яз, ЦицIигърин хуьр арандиз эвичIна. А.Азизова сифтедай СтIал Сулейманан тIварунихъ галай колхозда кIвалахна ва 1969-йисалай “Ашагастальский” совхозда базадин къаравулвал авуна.
Дяведин йисара акур азиятрикди ветеран 1991-йисуз рагьметдиз фена. Ам Агъа СтIал-Къазмайрал фаракъатнава. Рагьмет хьурай вичиз.
Тегъи Мегьамедов
