Махачкъалада цIи республикадин гьукуматдин “Душа Дагестана” премиядиз лайихлу хьанвайбурун концерт кьиле фена. Им халкьдин меденият, адетар хуьзвай, яратмишунрал машгъул ксарик руьгь кутун патал гузвай премия я. Адет тирвал, абурув премия чпин иштираквал аваз тешкилзавай концертдал вахкузва.

Урусрин драмтеатрдин гъвечIи залдиз “Душа Дагестана” премиядин лауреатар тебрикиз РД-дин Гьукуматдин Председателдин Сад лагьай заместителдин везифаяр вахтуналди тамамарзавай Анатолий Къарибов, РД-дин культурадин министрдин везифаяр вахтуналди тамамарзавай  Зарема Бутаева, адан заместитель, Дагъустандин халкьдин Яратмишунрин кIвалин директор Марита Мугадова, общественный тешкилатрин векилар ва масабур атанвай.

Гьар са коллектив, лауреат вичин мукьвабурунни багърийрин юкьва ацукьнавай.

Микрофондихъ атай А.Къарибова къейдайвал, “Душа Дагестана” премия — им гзаф жанрайрин яратмишунрал маш­гъул гьевес­кар­­риз — халкьдин адетдин меденият хуьзвай ксариз гузвай куьмек я.

— Инсандиз вичин руьгьдин, тарихдин ду­вулар ва культурадин адетар чир хьун лазим я. Культурадин хиле кIва­лахзавай­бу­рун буржи алатай несилрин художественный тежриба квадар тавун я, — алава хъувуна ада.

2017-йисан “Душа Дагестана” премиядиз 8 номинациядай 15 кас лайихлу хьана. Абурун арада чи ватанэгьлияр тир Нарулла Эмирбегов (Ахцегь район, “Халкьдин музалат” номинация), Османбег Мегьамедрагьимов (Докъузпара район, “Халкьдин устIар” номинация), Шагьбуба Къазиев (Мегьарамдхуьруьн район, “Халкьдин адетдин культура” номинация) ава.

Республикадин тIвар-ван авай и премиядин лауреатрин иштираквал аваз кьиле фейи концерт мярекатдин виридалайни итижлу пай яз гьисабиз жеда. Сегьнедиз халкьдин адетар, мани-макьам несилрив агакьарунин карда чпин гел тунвай Мегьарамдхуьруьн райондин зуьрнечийрин, Ахцегь райондай Эмирбеговрин, Докъузпара райондай Мегьамедрагьимоврин  хизанрин ансамблар чпин регьберрин — “Душа Да­гестан” премиядин лауреатрин гуьзчивилик кваз экъечIна. ЧIехи и концерт кьиле фидайла, неинки гьевескар артистрин алакьунриз къимет гудай, гьакI халкьдин музалатрин ва манийрин тIебии сесинихъ яб акалдай мумкинвал хьана. Концертда гьакIни премиядин лауреат Хан Баширова вичин ученик Шамил Шерифалиев галаз, Новруз Шагьба­зован ва Мухсин Камалован къа­юм­вилик кваз РД-дин халкьдин му­залатрин госоркестрди иштиракна.

“Душа Дагестана” премия гуз цIи 5 йис  я. Вири и вах­ту­н­да 67 кас адан лауреатар хьан­ва­­.

Дагъви Шериф