Республикадин Счетный палатадин материалрай аквазвайвал, 2019-йисуз бюджетдихъ галаз алакъалу законодательство чIурунай къуллугърал алай 110 кас жавабдарвилиз чIугуна, абурукай 14 кас алай къуллугърикай азадна. И делилар РД-дин Счетный палатадин алатай йисан кIвалахдин нетижайриз талукь яз ведомстводин коллегия кьиле физвай чIавуз раижна.
“Дагъустан” РИА-ди хабар гузвайвал, ведомстводин работникри бюджетдин харжияр нетижалубур хьунин, государстводин эменни ишлемишдайла, законодательстводал амал авуниз къимет гунин месэлайрал кьетIендаказ фикир желбна. И кIвалахдин сергьятра аваз 2019-йисуз региондин Счетный палатади жуьреба-жуьре 438 идарадин ва организациядин кIвалах ахтармишна.
И серенжемрин нетижада къуллугърал алай ксар административный рекьяй жавабдарвилиз чIугунин гьакъиндай 218 протокол туькIуьрна, 91 дело къарагъарна, гьакIни, санлай къачурла, 1 миллион манатдин кьадарда аваз жермеяр эцигна. Идалайни гъейри, жуьреба-жуьре дережайрин бюджетриз 100 миллион манатдилай виниз такьатар хкана, 89,7 миллион манатдин къимет авай эменнидиз талукь яз ихтиярар гуьнгуьна хтуна. Гьа са вахтунда коллегия кьиле фидай чIавуз бюджетдинни финансриз талукь хиле санлай къачурла дуьздал акъуднавай къанунсузвилерин кимивилерин кьадар тIимил хьайидан гьакъиндай малумарна. Дагъустандин Счетный палатадин делилралди, йисан къене ахьтин къанунсузвилер, пулдин кьадардалди лагьайтIа, 30 процентдин тIимил хьана. ИкI, эгер 2018-йисуз республикада ведомстводи 9,3 миллиард манатдилай виниз къимет авай такьатриз талукь яз къанунсузвилериз рехъ гайиди дуьздал акъуднайтIа, 2019-йисуз рекъем 6,6 миллиард манатдиз барабар хьана.
«Лезги газет»
