И йикъара чав чIулав хабар агакьна. Яргъалди чIугур залан азардикди, 74 йисан яшда аваз, лап хъсан педагогрикай сад, лезги чIалан ва  литературадин муаллим, шаир ва мухбир, дустарал рикI хьайи дуст, хизандин кьил Даниял Зияудинович Мегьамедов рагьметдиз фена. Ам чидай вирибуру яс чIугвазва, сада-садаз сабурар гузва.

Д.З.Мегьамедов 1946-йисан 16-январдиз Сулейман-Стальский райондин КIварчагърин хуьре дидедиз хьана. Хуьруьн мектеб, Дербентдин педучилище (1966), ДГУ-дин филфак (1974) ва аспирантура акьал­тIарна, ада вичин хайи хуьре, Ма­хачкъалада ва уьмуьрдин эхирдалди Кас­пийск шегьердин мектебра гьа­къисагъвилелди кIвалахна.

Педагогвилин гьунарлу ­зегь­метдай 1985-йисуз адаз “ДА­ССР-дин школайрин лайихлу муаллим” лагьай гьуьрметдин тIвар гана.

Муаллимвилин пешедихъ га­лаз санал вири уьмуьрда ада шаирвилин ва мухбирвилин везифаярни тамамарна. Иллаки чIаланни литературадин, марифатдинни тербиядин  месэлайрай гзаф кхьизвай. Аспирантурадани ада хайи литературадин месэлайрай  ахтармишунар кьиле тухвана. Адан къелемдикай аялар патал кхьенвай “Лезги ­шииррин азбука” (2004), “Ил­гьам­дин гелер” (2006), “Чубарукар” (2011) ктабар, Етим Эминан уьмуьрдиз ва яратмишунриз бахшнавай монография хкатна.

“Лезги газетдихъ” галаз ада датIана алакъа хуьзвай, Каспийск  шегьердин мектебра ва идарайра ам кхьин ва кIелун патал метлеблу кIвалах тухузвай.

Хейлин йисара ада шегьерда яратмишунрал машгъул лезгийрин кIватIалдиз регьбервал гана, чIалан жигьетдай абурув куьмекар агакьарна.

Даниял Зияудинович рикI михьи, гьалтай гьар садаз куьмек ва чирвал гуз алахъдай инсан тир. Ажалди анжах писни хъсан хкязавач.

Чна рагьметлудан хизандиз, мукьва-кьилийриз, багърийриз, вири кIварчагъвийриз башсагълугъвал гузва.

Даниял Зияудиновичан экуь къамат чи рикIелай садрани алатдач.

“Лезги  газетдин” редакциядин коллектив