Ватандин ЧIехи дяведин йисара агъзурралди дагъустанвийри, ватанпересвал къалуруналди, хайи мулкар душмандикай хвена. Фашистрал къачур гъалибвилик къурушвийрини чпин пай кутуна.

Ислягь девирдани къурушвийри Советрин Армиядин жергейра викIегьви­лелди, дирибашвилелди къуллугъзава. Къагьриманвал абуру Афгъанистандин дяведани, террористрин дестеяр чи республикадиз атайлани къалурна.

Хуьруьн жуьрэтлу рухвайрикай сад Къулиев Рафикни тир. Ам зегьметчи хизанда чIехи хьана. Къурушрин 2-нумрадин юкьван школа куьтягьай Рафик стхаяр Ревшанан ва Расиман (абуру вузра кIелзавай) гуьгъуьнаваз Москвадиз фена. Адаз меркездин медицинадин 1-нумрадин институтдик экечIиз кIанзавай. Гьайиф хьи, имтигьанар вахканатIани, конкурсдай акъатнач. Жегьил армиядиз фена,  ам Хабаровскдин крайдиз акъатна. Садани фикир­начир, армияда къуллугъун бедбахтвилиз элкъведа, рикIин мура­дар кьилиз акъуддай мумкинвал амукьдач лагьана. Ученийра снаряд хъиткьинна ва хасаратвал хьайи аскер госпиталдиз аватна­.

Сифтедай адаз къуллугъзавай чкадин духтурри куьмек гана, ахпа Рафик Къулиеваз Ленинграддин военно-медицинадин академиядин хирургри са шумуд сеферда операцияр авуна ва вилериз са гъвечIи хьтин ишигъ хкана. Къуллугъдин вахт куьтягь жедалди, жегьил госпиталра амукьна.

Бедендал хьанвай хирерин тIал акьалтI тежерди тир. ЯтIани Рафика усалвал къалурзавачир. Четинвилерин вилик муьтIуьгъ жедай къилих тушир аданди. Гадади вичин мурад кьилиз акъу­дуникайни фикирзавай. Адаз Кисловодскда ишигъ зайиф ксариз­ массажиствилин чирвилер, вердишвилер гудай колледж авайдакай хабар хьана ва ам аниз фена, колледждик экечIна. Им 1989-йис тир.

Студентвилин вахт акваз-такваз акъатзавай. Вич хьтин жуьрэтлу инсанар, муаллимар, лекцияр, семинарар, зачетар… хирерин тIални фикирдай акъатзавай. Гьайиф хьи, са шумуд операциядикай хкатай жегьилдин рикIихъ вири имтигьанриз жаваб гудай такьат амукьнач. 1990-йисан 20-февралдиз тарс физвай вахтунда ам куьтягь хьана. 23-февралдиз багърийри жегьил хуьре кучукна.

Адалай гуьгъуьниз диде Марияни, дах Беширни рагьметдиз фена. Амма чна викIегь хва, аскер рикIелай ракъурзавач.

Рамазан  Къулиев