Квез чидани?
Италияда Риомаджоре тIвар алай лап гъвечIи, амма фикир желбдай аламатдин шегьер ава. Ам шегьер я лугьузни жедач, уьлкведин агьалийри а чкадиз коммуна лугьузва. Риомаджоредин сад-садан кIулавай кIвалер, дараматар тик рагал экIя хьанва. Раган а патахъ Лигурийский гьуьл гала. Дараматар къадим девирдинбур, амма гьамиша къати рангаринбур яз хуьзва. Ана юкьван асиррин ибадатхана, гъвечIи тавханаяр, туьквенар ва кафеярни кардик ква. Итижлу делил ам я хьи, ана автомобилрин гьерекатдал къадагъа ала, гьавиляй гъвечIи шегьерда са машинни аквадач.
Гьеле XIII асирда грекрин зулумрихъай катай ксари бине кутур Риомаджоре Грециядин островрин адетдин хуьруьз ухшар я. ГуьтIуь даркалри, ккIари юкьван асиррин девирдикай хабар гузватIани, алай вахтунда ана Италиядиз хас шад уьмуьрди агъавалзава.
Риомаджореда 1485 кас яшамиш жезва. Патав гьуьл гвайвиляй агьалийрин асул тIуьнни балугърикай ва гьуьлуьн маса суьрсетрикай ибарат я. Шегьердин кьилихъ галай тепейра агьалийри салан майваяр, гзафни-гзаф зейтун ва ципицIар битмишарзава.
Риомаджоре тIебиатдал рикI алай инсанрин, туристрин фикир желбзавай гуьрчег, ажайиб чка я.
«Лезги газет»
