И йикъара Кьурагьрин 1-нумрадин юкьван школадин дидед чIалан муаллим Гьамият Абдуллаевнади лезги литературадин диб яратмишай чи районэгьли, вичел “бунтчи шаир” тIвар акьалтай Кьуьчхуьр Саидан уьмуьрдиз ва адан яратмишунриз талукь яз “Ачух тарс” тухвана. Кь.Саидан экуь къамат ачухарунин карда 6-8- классрин са жерге аялри чпихъ артиствилин алакьунарни авайди къалурна.
Шаирдин уьмуьрдикай ва адан яратмишунрикай муаллим Гь.Абдуллаевнади ва гьакI хейлин аялри гегьеншдаказ суьгьбетна. Инал тарсунин иштиракчийри Кь.Саидахъ гьакъикъатда кесиб халкь патал женгина кьетIен бажарагъ хьайиди, ам кIусни кичIевал авачиз, ханаризни беглериз акси экъечIайди ва ада девлетлуяр вичин ялавлу шиирралди русвагь авурди рикIивай гьиссна. Халкьди Саид вичин регьбер яз кьуна, гьамиша адан терефдал хьана.
Тарсуна кинодин экрандикайни гегьеншдиз менфят къачуна. Адалай аялриз Кьуьчхуьррин куьгьне хуьр, Саида диндин тарсар къачур медреса (ихьтин медресаяр хуьре кьвед авай), хуьруьн патарив гвай гуьзел яйлахар, кьилихъ галай такабур Кетин дагъдин этегар, хуьр куьч хьанвай Бугъда-Тепеда Саидаз ачухнавай гуьрчег памятник, маса важиблу затIарни акуна. И кардини тарс метлеблу авуна.
Тарсунин эхирда шаирдин чIалариз кхьенвай манийрихъ яб акална. Аялрин гьакI Кьуьчхуьр Саидан уьмуьрдиз талукь хейлин сегьнеярни къалурна.
Муаллимри тарсуниз лап виниз тир къимет гана. Тарсарилай алава яз тухузвай ихьтин мярекатри аялрин зигьинда дерин гел тадайдахъ чун мад сеферда инанмиш хьана.
М. Агьмедова
