Алатай жуьмядиз Махачкъалада, республикадин онкоцентрада, са сменада 200 кас кьабулдай мумкинвал гузвай поликлиника ва 40 койка авай стационар ачухна.
Республикадин онкологиядин центрадин (виликдай — диспансердин) алава дарамат эцигунив 2012-йисуз эгечIнай. Амма пулдин такьатар бес тахьун себеб яз гуьгъуьнлай ам акъвазарнай. Объект эхциг хъувун 2018-йисуз давамарнай. Дагъустандин здравоохраненидин министерстводин делилралди, ам акьалтIарун патал федеральный бюджетдай 350 миллион манат чара авуна.
— Республикада чебни нурарин диагностика патал алай аямдин вири истемишунрив кьунвай тадаракралди, УЗИ-дин аппаратдалди, эндоскопиядин техникадалди, МРТ-далди (магнитно-резонансный томограф) таъмин, са сменада 200 кас кьабулдай мумкинвал гузвай поликлиника ва 40 койка авай стационар ишлемишиз вахкуни онкологиядин азарар сифтегьан стадийра амаз дуьздал акъуддай ва идахъ галаз сад хьиз азарлуйрив вахтунда лазим куьмек агакьардай мумкинвал гуда, — лагьана дарамат ачухуниз талукьарнавай мярекатдал РД-дин Гьукуматдин Председателдин Сад лагьай заместитель Анатолий Къарибова.
Адан гафаралди, цIийи поликлиникадин кIвалах азарлуйрин къулайвал фикирда кьуналди кардик кутунва, яни абурувай чеб ина ахтармишун патал гьам регистратурадикай, гьамни интернетдикай менфят къачуналди нубат кьаз жезва.
— Республикадин агьалийривай ина чпихъ виниз тир пешекарвал авай духтуррин куьмек къачуз жеда. Ида агьалийриз, Дагъустандилай къецез фин тавуна, чпин сагъламвал мягькемардай, идалди пулдин такьатар ва вахт кьенятдай мумкинвал гуда. Алай аямдин поликлиникада азарлуйривай меслятар (консультация) ва химиотерапиядикай менфят къачуз жеда. Поликлиникадихъ алай аямдин вири тадаракар ава, — алава хъувуна Сад лагьай вице-премьерди.
Дагъустандин здравоохраненидин министр Жамалудин Гьажиибрагьимова чи республикада гьар йисуз ракдин 5 агъзурдав агакьна цIийи дуьшуьшар дуьздал акъудзавайдакай, саки 2 агъзур кас и чIуру азардикди рекьизвайдакай хабар гана.
— И гьар са рекъемдихъ са касдин кьисмет гала. Къенин юкъуз республикадин здравоохраненидин вилик квай месэлайрикай сифтени-сифте фикир гана кIанзавайди онкологиядин азарар фадамаз винел акъудун ва технологиядин виниз тир махсус куьмек агакьарун я. Онкоцентрада агьалийриз консультацийрин ва диагностикадин куьмек гун патал алай аямдин поликлиника ачухун онкологиядин азарар фадамаз винел акъудунин карда важиблу кам я,- къейдна ада.
«Лезги газет»
