КIвалахдин рекьяй Дагъустанда мугьманвиле авай Россиядин Федерациядин просвещенидин министр Сергей Кравцова Дагъустандин Кьил Владимир Васильеван иштираквал аваз кьиле фейи совещанидал республикада образованидин хиле хьанвай нетижайриз еке къимет гана.
Вичин рахунра Сергей Кравцова республикадин Кьилиз образованидин хилен кIвалахдиз фикир гунай сагърай лагьана.
Министрди суьгьбетна хьи, совещание башламиш жедалди вилик ам Дагъустандин Гьукуматдин Председатель Артем Здуновахъ галаз санал алай йисан мартдиз ишлемишиз вахкудай Махачкъаладин мектебрикай садаз мугьман хьана. Ада а кардиз фикир гана хьи, шегьердин и районда важиблу месэла — пуд сменада кIелунин месэла гьялда. Шегьердин мектебра пуд сменада кIелун арадай акъудунин месэла ведомстводин кьили виридалайни важиблубурукай сад яз гьисабзава, гьикI лагьайтIа, ам ерилу образованидихъ галаз алакъалу я. И терефдай Дагъустанда хейлин кIвалах тухузва.
С.Кравцова республикада агалкьунралди гьялзавай мад са месэладикай — образованидин идараяр автобусралди таъминаруникай лагьана: “Зун гъавурда авайвал, гьеле 10 йисалай гзаф вахтунда ишлемишай вири автобусар дегишарнава. Алай вахтунда алава налогрин гьисабдай вишдав агакьна автобусар маса къачунва. Им аялрин хатасузвал таъминардай важиблу кIвалах я”.
Россиядин просвещенидин министерстводин кьили мектебар учебникралди таъминарунин кIвалахдизни рази жедай къимет гана: “Са вахтунда и месэла республика патал виридалайни кар алайбурукай сад тир. Къе и месэла гьялнава. И кар школайрин директорри ва муаллимрини тестикьарзава”.
Адан гафаралди, маса терефрайни тайин тир нетижаяр ава, гьа гьисабдай яз — Государстводин сад тир экзамен тухунин кардани. “За умуд кутазва хьи, и дережа амукьда, ерилу образованидиз талукь яз са жуьрединни месэлаяр арадал къведач”, — малумарна С.Кравцова. Гьа са вахтунда ада къейдна хьи, ЕГЭ кьиле тухун — им школьникар патал чпин чирвилер са шартIара къалурдай ва абурувай кьилин ва я юкьван образованидин идарайрик экечIиз жедай мумкинвал я.
«Лезги газет»
