Республикадин садакай масадак акатдай азаррин, СПИД-дин вилик пад кьадай ва адахъ галаз женг чIугвадай центр патал 120 миллион манатдин къимет авай виниз тир еридин тадаракар маса къачунва. Идан гьакъиндай “Лезги газетдиз” республикадин Минздравдин пресс-къуллугъди хабар гана.
Центрадиз тадаракар маса къачуниз акъатзавай чIехи пай харжияр республикадин Минздравди вичин хивез къачуна. ЛПУ-да сифте нубатда капитальный ремонт кьиле тухвана, са шумуд отделение цIийикIа туькIуьр хъувуна. Центрадин реанимациядин къурулушдив ИВЛ-дин 15 аппарат, азарлуяр къатканвай кроватрин патав жедай 22 кардиомонитор, инфузоматар, махсус кроватар, дефибрилляторар ва каталкаяр агакьна.
Азарханадин гьар са дараматда рентген-аппаратар ва УЗИ-аппаратар эцигнава. ЦIийи техникадалди санблок, кухня ва складарни таъминарнава. Клиника тадаракламишунин кIвалах гуьзчивилик кутунихъ галаз сад хьиз, центрадин кьиле авайбуру чпин пешекарар гьазурунизни еке фикир гузва. Центрадин духтурри РФ-дин лап хъсан клиникайра чпин пешекарвал хкажзава. Азарлуйриз медицинадин рекьяй къуллугъ авунин ери хкажун патал “Телемедицина” программадай кIвалах тухузва.
«Лезги газет»
