Республикадин Гьукуматдин вице-премьер Абдулмуслим Абдулмуслимован регьбервилик кваз 10-февралдиз кьиле фейи совещанидал Дагъустанда кабачокар (бурандин жинсиникай тир майва) ва рангунин келемар гьасилунин месэлаяр веревирдна.
Асул месэладив эгечIдалди вилик гьукуматда хуьруьн майишатдин месэлайрал машгъул вице-премьерди къейд авурвал, республикадин тIебиатдинни накьвадин шартIар гьихьтин хьайитIани культураяр битмишарун патал кутугайбур ятIани, Дагъустандин лежберри къунж (люцерна) цазвач, ягъ хкуддай набабатар, рапс, кабачокар гьасилзавач, рангунин келем цазвайбурун кьадарни тупIаралди гьисабиз жеда.
А.Абдулмуслимова къейд авурвал, кабачокрихъ авай игьтияж муьштерийрин арада винизди я, инвесторриз и суьрсет Дагъустандин лежберривай маса къачудай фикир ава.
Совещанида иштиракай Дагъустандин тежрибайрин станциядин — Вирироссиядин набататрин генетикадин ресурсрин Вавилован тIварунихъ галай институтдин Федеральный ахтармишунардай центрадин филиалдин директор Киштили Куркиева суьгьбет авурвал, центрадин пешекарри гьар йисуз 30-далай артух сортарин рангунин келемар ахтармишзава, гьаниз килигна гьеле къедамаз алимривай чкадин лежберриз Дагъустандин шартIара гьасилиз виридалайни къулай сортар теклифиз жеда.
“Чи кьилин макьсад Дагъустандин хуьруьн майишатдин суьрсет гьасилзавайбур вири и набататар, къецепатан уьлквейрай маса къачун тийиз, чина битмишариз жезвайдан гъавурда тун я”, — лагьана А.Абдулмуслимова.
«Лезги газет»
