30-январдиз Белиж поселокдин Мегьамед Ярагъидин тlварунихъ галай умуми образованидин школада лезги чlалал шиирар хъсандиз кlелдайбурун арада Республикадин конкурсдин сад лагьай пай кьиле фена.
Ана Дербент райондин 11 школадин 9-11-классра кlелзавай аялри иштиракна.
Иниз гьакI Дербент райондин образованидин управленидин, Дагъустандин писателрин Союздин векилар, школайрин директорар, лезги чlаланни литературадин муаллимар ва масабур атанвай.
Конкурсдин иштиракчияр школадин директор Имара Заловади, РУО-дин начальник Пирмали Наврузалиева, шаир Владик Батманова, шаир ва муаллим Гъулангерек Ибрагьимовади тебрикна.
“Диде кlандайдаз чlални кlан жеда. Чlал чаз дидеди гузвай аманат я. Аманат ядигар яз эбеди хвена кlанда. Дидедиз гьуьрметзавай инсанди чlалазни гьуьрметда”, — акьалтIарна вичин гафар шаир-муаллимди. Ахпа ада “Рагъ я диде!” тlвар алай вичин шиирни кlелна.
Конкурсдин иштиракчийри Фейзудин Нагъиеван, Лезги Арифан, Гъулангерек Ибрагьимовадин, Владик Батманован, Сажидин Саидгьасанован, Седакъет Керимовадин ва маса авторрин чlалар устадвилелди кIелна.
Жюриди нетижаяр кьазвай арада поселокдин аялрин яратмишунрин кlвалин тербиячийри милли чIалал манияр лагьана, “Кавха” ансамблди кьуьлерна.
Конкурсдин нетижаяр: 1-чка — Зейнал Умудалиева (Белиждин 1-нумрадин СОШ);
2-чкаяр — Марсель Сефербегова (Белиждин 4-нумрадин СОШ) ва Нармина Омаровади (Белиждин 3-нумрадин СОШ);
3-чкаяр — Бесай Тагьировади (Агълабрин СОШ) ва Эллада Рамазановади (ЛукIарин СОШ) кьуна.
Гъалибчийрив Пирмали Наврузалиева грамотаяр вахкана, Владик Батманова вичин ктабар багъишна. Сад лагьай чка кьур Зейнал Умудалиева Махачкъалада кьиле фидай республикадин конкурсда иштиракда.
Къагьриман Ибрагьимов
