28-январдиз РД-дин Кьил В.Васильева исполнительный, законодательный, муниципальный властдин органрин кьиле авай ксарин иштираквални аваз гьар гьафтеда тухузвай совещанидал Пятигорскда СКФО-да РФ-дин Президентдин тамам ихтиярар ганвай векил виликан прокурор Юрий Чайкадихъ галаз гуьруьшмиш хьайиди рикIел хкана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
В.Васильеван ихтилатрай, тамам ихтиярар ганвай векилди Россиядин Президентди Федеральный Собранидиз кIелай Чарче ва милли проектар уьмуьрдиз кечирмишунин карда вилик эцигнавай везифаяр кьилиз акъудун патал вичи кIвалахдай тегьердикай лагьана.
“Ада чи фикир а кардал желбна хьи, вичи намуслувилелди, вири къуватар эцигна кIвалахда ва чавайни гьа икI истемишда”, — и къайдада кIвалахдив эгечIуни хъсан нетижаяр арадал гъида, инанмишвална В.Васильева.
РД-дин Кьили мадни къейд авурвал, Ю.Чайкади кьетIен везифа вилик эцигнава — гьар са кепек харж ийизвай гьалдал гуьзчивал тухун таъминарин. В.Васильева малумарайвал, тапшуругъар кьилиз акъудунал кIеви гуьзчивал тухуда.
“Чнани куьне санал ийизвай кIвалахар федеральный дережада ийизвай крарихъ галаз туьш жезва. Мисал яз, чна налогар кIватIунин кIвалахдик гьерекат кутуна, гьа гьисабдай яз транспортдин налог кIватIунин пилотный проектни уьмуьрдиз кечирмишна. Эгер виликдай и налог кIватIуни 40 процент тешкилзавачиртIа, гила чна и рекъем 50 процентдилай алуднава. Россияда юкьван гьисабдалди и налог кIватIуни 70 процент тешкилзава. Чи вилик акъвазнавай везифа и рекъемдив агакьарун ва, вири мумкинвилер ишлемишна, 100 процентдив агакьдайвал авун я”, — малумарна Владимир Васильева, кIватI хьанвайбурухъ элкъвена.
Республикада тухузвай менфятлу кIвалах рикIел хкуналди, Владимир Васильева лагьана: “Алай вахтунда республикада кьиле тухузвай пилотный проектри зурба итиж арадал гъанва. Инсанри хсуси ва я корпоративный итижар кваз такьаз кIвалахзава ва санлай Дагъустандин агьалийрин вилик акъвазнавай везифаяр тамамарун патал алахъзава”.
Региондин регьбердин гафаралди, кIватIзавай пулар гьиниз вуч харжзаватIа, агьалийриз малумарун герек я. Гьа икI, кIватIнавай артухан налогрин гьисабдай дагълух хуьрерин агьалиярни кваз хъвадай целди таъминарнава. Рекьер авачир чкайриз рекьер тухванва. Школаяр — автобусралди, медицинадин идараяр тади куьмекдин машинралди таъминарнава.
“Гьа и рекьяй чун мадни виликди фида, гьикI хьи, инсанриз мадни хъсандиз яшамиш жез кIанзава. Чи везифани абурун къаршидиз экъечIун, экономика хкажун, инсанрин уьмуьр агьваллуди авун я”, — къейдна Владимир Васильева.
«Лезги газет»
