ЧIехи Гъалибвилин — 75 йис
Герей Гьажитаев 1920-йисуз Хиврин хуьре кесиб лежбердин хизанда дидедиз хьана. Аял ва жегьил вахтар ада, вичин таяр-туьшери хьиз, мал-къара хуьз, чуьлда кIвалахар ийиз акъудна. Ватандин ЧIехи дяве башламишайла, ам 20 йиса авай жегьил тир. Ватандин эвер гун Герея гьасятда кьабулна ва дяве башламиш хьайи сифте йикъара Хив райондин РВК-дай ам фронтдиз рекье гьатна.
Ада 125-нумрадин стрелковый полкуна къуллугъна. Фашистрихъ галаз сифте ягъунрик Белоруссиядин чилел экечIна. Ам Брестдин къеле хуьнин лап къизгъин женгерин иштиракчи хьана. Бахтунай хьиз кьиникьикай къутармиш хьайи красноармеецди мадни душман кукIваруник вичин пай кутуна. Фашистар терг ийиз-ийиз, дяведин цIаярай ам Берлиндиз кьван фена, чун гъалиб хьунин шадвални гьана къейд авун кьисмет хьана.
Дяведа къалурай гьунаррай адаз цIудалай виниз орденар, медалар, гуьгъуьнлай юбилейрин медалар, грамотаяр гана.
1946-йисуз хайи хуьруьз хтай Герей ислягь зегьметдив эгечI хъувуна.
Рамазан Велибегов
