28-январдиз Дербент шегьердин мэр Хизри Абакарова вичин заместителрихъ, РД-дин “Минмелиоводхоз” ФГБУ-дин руководитель Залкип Къурбановахъ галаз санал Самур-Дербент къанал цIийикIа туьхкIуьр хъийизвай гьал ахтармишна. Идан гьакъиндай “Лезги газетдиз” шегьердин администрациядин пресс-къуллугъди хабар гана.
И къанал Дагъустанда чIехибурукай сад я — ада вири Кьиблепатан Дагъустандин хуьруьн майишатдин чилер дигидай целди таъминарзава. Къанал цIийикIа туьхкIуьр хъувунин сад лагьай девир 2015-йисуз башламишнай. 2019-йисан октябрдиз лагьайтIа, Дербент шегьердин къенепатай физвай 5 километрдин участок цIийикIа туьхкIуьр хъийиз башламишна.
Шегьердин кьил, кьиблепатахъай башламишна, шегьердиз кеферпатахъай гьахьзавай чкадал кьван Самур-Дербент къанал тирвал къекъвена. Ада къейдна хьи, кIвалахар планламишнавайдалай йигин еришралди виликди физва. Мартдин юкьвара 2,4 километрдин яргъивал алай участок цIийикIа туьхкIуьр хъувуна куьтягьун ва къаналдин патарив гвай чкаяр аваданламишун планламишнава. Проектда къаналдин кьве патайни са метр гьяркьуьвал аваз кIвачи къекъведай рехъ туькIуьрун къалурнава.
Минмелиоводхоздин кьиле авай ксари проектдик дегишвилер кухтун планламишнава — машинар фин патал къанал тирвал чиргъ вегьенвай гьяркьуь рехъ туькIуьрда. Ахтармишдайла чир хьайивал, къаналдин къерехра авай кIвалера яшамиш жезвай агьалийрин канализациядин (чиркин) ятар дуьм-дуьз къаналдиз авахьзава. Къейдна хьи, ихтиярсуз туькIуьрнавай ихьтин сетар маса чкадал тухун лазим я. Марфар къвайила, федеральный шегьреда арадал къвезвай селлерин ятар Самур-Дербент къаналдиз авахьзава. Им санитариядин нормайрив ва къайдайрив кьазвай кар туш.
Хизри Абакарова къейдна хьи, и месэла гьялун чарасуз я. Кьилди къачуртIа, УЖКХ-дин, УКС-дин, “Дербент — 2.0-дин” пешекарар квай комиссия тешкилнава, абуру къанал туькIуьр хъийидайла арадал къвезвай месэлаяр гьялда.
“Проект уьмуьрдиз кечирмишуни къанал чиркинарзавай канализациядин ятар аниз авахьун акъвазарун лазим я. ЦIийи къаналди и районда чилер ци басмишун акъвазарда ва анрай чIуру ни хкведач. Къанал тирвал законсуздаказ кIвалер эцигнава. И карди къанал цIийикIа туьхкIуьр хъувуниз манийвал гузва. Идахъ галаз алакъалу яз администрациядин оперативный дестеди суддин къайдада законсуз эцигнавай кIвалер, суддиз вугуналди, чукIурунин къарар кьабулнава. За шегьерэгьлийривай къанал цIийикIа туьхкIуьр хъийидай вахтун-да арадал къвезвай къулайсузвилер эхун тIалабзава”, — лагьана шегьердин кьили.
«Лезги газет»
