Дагъустандин здравоохраненидин министерстводин сайтда хабар ганвайвал, и йикъара Махачкъалада, республикадин клинический больницадин (РКБ) кайи хирер сагъардай (ожоговый) центрада, мергьяматлувилин “Хъвер операция” фондунин чи региондиз мугьман хьанвай са шумуд ва винидихъ тIвар кьунвай центрадин хирургри санал аялрин чинрал ва гъилерал кайи хирери тунвай кьацIар, лишанар (рубцы) алудун патал тамам пуд юкъуз 27 аялдиз операцияр авуна. Абуру жезмай кьван гзаф аялриз куьмек гун патал пакаман сятдин 8-далай нянин лап геждалди зегьмет чIугваз хьана.
Мергьяматлувилин “Хъвер операция” фонд Россияда кардик кваз 10 йис я. И вахтунда, чи уьлкведин жуьреба-жуьре регионриз физ, хирургри чеб дидейриз чиник нукьсанар (“къуьрен пIузар”, “жанавурдин сив”) кваз хьанвай агъзурралди бицIекриз пулсуздаказ операцияр авуна. Хирургрин чIехи командада кайи хирери тунвай еке кьацIар “алуддай” зурба устадарни ава. Абур ихьтин аялриз куьмекар гуз гьазур я. Фондунин макьсад бицIекрин аквадай чкайрал алай кьацIар алудун, идалди чIуру гел тур мусибат гележегда абурун рикIелай алудиз куьмек гун я.
Ихьтин операцияр РКБ-дин винидихъ тIвар кьунвай центрадани гьар йисуз вишелай артух кьилиз акъудзава. Амма Россияда тIвар-ван авай хирургрин десте Дагъустандиз атун, залан хирер хьайи ва абуру еке кьацIар тур аялар хкягъун, ахпа операцияр авун Дагъустандин кьиле авай ксарин ва кьилди республикадин здравоохраненидин министерстводин агалкьун я.
— Заз Дагъустандин здравоохраненидин министр Жамалудин Гьажиибрагьимоваз, РКБ-дин кьиле авай ксариз ва куникди хьайи хирер сагъардай центрадин пешекарриз чун хушдаказ кьабулунай ва лазим вири шартIарни мумкинвилер яратмишунай сагърай лугьуз кIанзава. Чна санал къени кар кьилиз акъудна — аялриз хъвер багъишна, идалди абурун уьмуьр бахтлуди авуник шерик хьана, — къейдна мергьяматлувилин “Хъвер операция” фондунин директор Татьяна Пошехоновади.
Социальный сетрай республикадиз Москвадай пешекарар къвезвайди чир хьайила, 37 аял диде-бубайрихъ галаз хирургрин куьмек кIанз атана. Абурукай, чна винидихъ лагьанвайвал, 27 аялдиз ва жаванриз операцияр герекзавайди малум хьана. Куьмек кIанз атанвайбурун арада СКФО-дин жуьреба-жуьре регионрай тир, чи республикада виликдай чпин уьмуьр къутармишай аялар ва жаванарни авай. Вахтар фена, хирер, хам сагъ хъхьайла, абурувай векъи кьацIар хьанвай гъилерин, тупIарин кIаламар ва гардан юзуриз, муьтIуьгъариз жезвачир. Хирургрин везифа аялриз куьмек гун, юзун-гьерекат чкадал хкун тир. Нетижада и кар кьилиз акъудиз алакьна.
Регина Семедова
