Усугъчайви Абдурза Садиров спортдин рекье еке агалкьунар къазанмишнавай викIегь пагьливанрикай сад я. Ада 2017-йисуз Сербияда ва 2019-йисуз Румынияда грэпплингдай кьиле фейи Европадин чемпионатра къизилдин медалар къачуна.
И мукьвара чав спортсмендин агалкьунрихъ галаз алакъалу мад са шад хабар агакьна — РФ-дин спортдин министр П.Колобкован къарардалди Абдурзадиз кьуршахар кьунай спортдин международный классдин мастервилин тIвар ганва.
РикIел хкин: 1993-йисуз дидедиз хьайи А.Садиров гъвечIи чIавалай азаддиз кьуршахар кьунал машгъул хьана. Ада хейлин акъажунра гъалибвилер, кIвенкIвечи чкаяр кьунва.
Спортдин кесерлу майданра Европадин чемпионатра кьве сеферда чемпионвилин тIвар къачунвай Абдурза мадни виниз тир дережадин тIварариз лайихлу пагьливан я. Къуй ам гьа дережайривни агакьрай!
«Лезги газет»
