Хив районда генерал-майор Рагьманов Арсен Фармановичахъ галаз гуьруьш кьиле фена. Ам “Хив район” МО-дин кьил Ярмет Ярметова кьабулна ва нубатдин чин рикIин сидкьидай тебрикна.
Идалай гуьгъуьниз Гъалибвилин паркуна авай мемориальный комплексдал общественностди цуьквер эцигна. Инлай кIватI хьанвайбур администрациядин дараматдиз хтана. Хив ва Агъул районрин военный комиссар Пирмегьамед Кубачева кIватI хьанвайбур Арсен Рагьманован уьмуьрдин, къуллугъдин биографиядихъ галаз танишарна. Арсен Рагьмановаз генерал-майорвилин чин гун райондин общественный палатадин векил Бегбала Бегова, школадин ученик Умалат Мирзеханова ва масабуруни тебрикна.
Мярекатдин эхирдай Арсен Фармановича кIватI хьанвайбуруз сагърай лагьана ва жегьил несилдиз хъсандиз кIелуниз, Ватандиз намуслувилелди къуллугъ авуниз эвер гана.
Генерал-майор Арсен Рагьманов Мегьарамдхуьруьн райондани хушдиз кьабулна. Райондин муниципалитетдин кьил Фарид Агьмедова Арсен Рагьмановаз Россиядин Федерациядин Яракьлу Къуватрин генерал-майорвилин чин гун тебрикна. Багьа мугьмандин тIварцIихъ мадни чими гафар лугьунихъ галаз сад хьиз ада Рагьмановаз райондин кьилин награда тир “Мегьарамдхуьруьн райондин гьуьрметлу гражданин” знак гана.
Вичин нубатдай Арсен Рагьманова Фарид Агьмедоваз ва районэгьлийриз рикIин сидкьидай сагърай лагьана.
Гьа ихьтин хуш гуьруьш Сулейман-Стальский райондин администрациядани кьиле фена.
«Лезги газет»
