ЧIехи Гъалибвилин — 75 йис

Вири уьлкведа хьиз, Дербент шегьердани­ Ватандин ЧIехи дяведа чи баркаллу Яракь­лу Кьушунри, Советрин вири халкьди къанлу Гитлеран чапхунчийрин аксина игитвилелди кьиле тухвай женгер эбеди яз рикIел хуьз­ва.

Гъалибвилин 75 йисан лишанлу юбилейдиз гьазурвилер акунин барадай шегьердин мэр Хизри Абакаров кьиле аваз тешкилнавай махсус комитетдин заседание кьиле фе­на ва анал 9-Майдин сувар тешкилуникай ге­гьенш ва итижлу ихтилат хьана. Мярекатдал шегьердин депутатрин собранидин председатель Мовсум Рагьимова малумарайвал, алай вахтунда шегьердин мектебра, кьилин ва юкьван образованидин идарайра Гъалибвилин сувариз талукьарнавай игитвилин тарсар кьиле тухузва, акьалтзавай несил дяведин иштиракчийрихъ ва ветеранрихъ галаз гуьруьшмиш хьунар тешкилзава. И барадай шегьерда кардик квай Женгинин баркаллувилин  музейда гьар гьафтеда тухузвай мяре­катар гзаф маракьлубур жезва.

РикIел хкин. Ватандин ЧIехи дяведин женгериз Дагъустандин вири халкьарихъ галаз санал 16 агъзурдалай гзаф дербентвиярни, гьа жергедай яз 6 агъзур кас гуьгьуьллудаказ фейи­ыди я. Алай вахтунда  абурун игитвилериз талукь памятникар, мемориалар къайдадиз хкизва, аскеррин сурар кул-кусри­кай михьзава, аниз фенвай рехъ туькIуьрзава.

Гъалибвилин сувариз гьазурвилер акуник шегьердин “Горзеленхоз” идарадин коллективдини вичин зегьметдин пай кутазва. Карханадин директор Сергей Аллагькъулие­ва малумарайвал, шегьердин Женгинин баркаллувилин паркуна, “Гьамишалугъ цIай” мемориалдин ва Игитрин аллеядин къерехар тирвал 300 — далайни гзаф хризантемадин кул-кусар цанва. И хъсан кIвалах аскеррин сурарани давамардайвал я.

ЧIехи Гъалибвилин суварихъ галаз ала­къалу са лишанлу  вакъиа алатай йисан октябрдин вацра Игит шегьер Севастополда кьиле фена. Ана Дагъустандин 345-стрелковый дивизиядин аскеррин гьуьрметдай памятник ачухна (ихьтин памятник Дербентдани ава). Лишанлу мярекатда Дагъустандин милли политикадин ва динрин крарин рекьяй министр Энрик Муслимова, Дербент шегьердин администрациядин кьилин заместитель Заур Эминова, музей-заповедникдин директор Али Ибрагьимова ва масабуру иштиракна.

Дагъдин къванцикай скульптор, Дагъустандин халкьдин художник Мегьамед-Али Алиева гьазурнавай и памятник ачухдайла, Энрик Муслимова Дагъустандин Кьил Владимир Васильеван ва вичин патай мярекатдин иштиракчияр  тебрикна ва Севастополь фашистрикай азадуник дагъустанвийрини ла­йихлу пай кутурди къейдна.

Черноморский флотдин командующийдин заместитель, контр-адмирал И.Курочкина ва Севастополь шегьердин куль­турадин управленидин начальник Н.Краснолицкийди чпин ­рахунра къейдна хьи, Ватандин ЧIехи дяведин йисара гитлеровчийрихъ галаз женгера советрин уьлкведин вири миллетрин ве­килри иштиракна, душмандин винел гъалибвални къазан­мишна.

Генани рикIел хкин. Вичик Кавказдин вири халкьарин ва маса миллетрин векиларни квай Дагъустандин 345-стрелковый дивизия 1941-йисан зулуз Дербентда арадал гъайиди тир. Туапседай Севастополдиз рекье тур и дивизияди анин Мекензидин дагълара немсерихъ галаз игитвилелди женг чIу­гунай ва фашистар шегьердивай яргъаз чукурнай. Дивизиядин лап чIехи пай аскерар барабарсуз женгера телеф хьанай.

Мярекатдал малум хьайивал, Севастополдин гел жагъурдайбуруз Мекензидин дагълара “Дербент” гаф кхьенвай тIурни жа­гъана. Ам алай вахтунда шегьердин музейда хуьзва.

Пехъи душмандин винел советрин халкьдин ЧIехи Гъалибвал тарихда вичиз тешпигь авачир хьтин зурбади я.

Нариман Къарибов