Сулейман-Стальский районда лап къалиндаказ цадай ва фад бегьердал къведай багълар кутуниз талукь проектар кьилиз акъудзава. ИкI, Цмуррин хуьруьн мулкунал “Восход” ООО-ди (учредитель — Марат Шайдаев) ихьтин шуьмягъин багъ кутунин проект гъиле кьунва.
— Пландин бинедаллаз чна 50 гектарда шуьмягъин багъ кутада, — лугьузва карханадин генеральный директор Мурад Муртузалиева. — Къелемар Италиядай гъанва. Абур цунин кIвалахар хъсан тешкиллувал аваз кьиле физва. Бес кьадар чил гьазурнава.
Малум хьайивал, дагъдин участокда кутазвай багълариз яд, чиликай шлангар тухвана, марфадин къайдада гуда. И кар патал насосрин станция эцигнава, 500 кубометр яд гьакьдай вир кьунва. Израилдин технологиядалди яд гун патал турбаяр, герек маса тадаракарни хканва. Абур дуьздаказ тайинарун патал Воронеждин дигидай цин институтдин пешекарар желбнава. Карханада чпихъ галаз зегьметдин икьрарар кутIуннавай пешекарри, рабочийри, механизаторри кIвалахзава.
— Чна къелемар арада 3 метр аваз цазва. Жергейрин арайра 5 метр ава, — лугьузва агроном Мегьамед Муртузалиева. — Ида бегьердал атай багъларай шуьмягъар махсус техникадин куьмекдалди кIватI хъийидай мумкинвал гуда.
Проектда къалурнавайвал, са гектардин багъда 666 къелем цазва. Гьар са къелемдин пуназ миянардай шейэр вегьезва, яд гузва.
Чаз акурвал, рабочийрихъ галаз санал, багълар кутунин кIвалахрал Цмуррин юкьван школадин муаллимарни техработникар (50 кас) ва кIелзавайбур (40 аял) машгъул тир. Са куьруь вахтунда абуру са гектарда шуьмягъин къелемар цана. И карда школадин чIехи классра кIелзавай Санжа ва Гьуьсейн Нуралиеври, Фатима Агъабеговади, Велибег Мегьамедова, Мадина Устаагьмедовади, Жамал Агъабегова, Мегьамедзагьир Алибегова, Хадижа Агъабеговади тафаватлувал къалурзава.
— Цмурдал хуьруьн майишатдиз майил авай школа кардик кваз пуд йис я, — лугьузва школадин директор Абдулнасир Ханвердиева. — 120 аялди кIелзавай школа алай аямдин тадаракралди таъмин я. Школада производстводин мастерскояр кардик ква. Идалайни гъейри, чна хуьруьн майишатдин хилен пешекарар гьазурунин мураддалди Дагъустандин аграрно-экономический колледждихъ галаз икьрар кутIуннава. Ана чи са шумуд выпускникди кIелзава. Анаг акьалтIарай жегьил пешекарар хайи хуьруьз хкведа, “Восход” ООО-да абуруз кIвалахни гуда.
Шуьмягъин багълар кутунин кIвалахар давам жезва.
— Цмуррин хуьруьн мулкунал шуьмягъин багъ кутун — им райондин дагъдин патав гвай чилерал кьилиз акъудзавай инвестицийрин сад лагьай проект я, — къейдзава райондин кьил Нариман Абдулмуталибова. — И хийирлу кар кьунай кьегьал сихилдин векил тир Марат Шайдаеваз чна сагърай лугьузва.
Хазран Кьасумов
