Культурадин хилен зегьметдин ветеран, ДАССР-дин культурадин лайихлу работник, республикадин лезги писателрин Союздин член, сегьнедин устад, яратмишунрин жуьреба-жуьре конкурсрин лау­реат  Гьемдуллагь  гьажи  Бабаеван  и йикъара 80 йис тамам хьана.  Юби­лейдиз талукь яз Ахцегь РДК-дин залда гурлу межлис кьиле тухвана­.

Фяле, устIар, багъманчи, шаир, артист, му­­аллим, художник, музыкант, драматург, ре­­жиссёр, актёр, фе­кьи (гьи кIвалах хьайи­тIа­ни, вижевайдаказ гъиляй къведай адан ­сеняткарвилерни майилвилер гьисабун четин я), кьилинди, намуслу ва­танперес, муъмин ин­­сан, ам неинки са Ахцегь районда, гьакI адалай къецени машгьур я.  Зал мукьва-кьилийривни ярар-дустарив ва яратмишунрин интеллигенциядин векилрив ацIанвай. Фойеда Гь.Бабаеван уьмуьрдинни яратмишунрин рекьиз бахшнавай выставка ачухнавай. Инсанрин фикир ина иллаки адан гъилин хатIа­рин ктабри (пулдин такьатар авачиз, абур чап ийиз жезвач) желбзавай.

Юбилярдин уьмуьрдинни яратмишунрин рекьикай куьруь гаф рахуналди ва вичин шиир кIелуналди (ам чна агъадихъ гузва), мярекат райондин культурадин управленидин начальникдин куьмекчи, жегьил шаир Сулейман Сулейманова ачухна ва кьиле тухвана.

Алакьунрихъ авач сергьят,

Гьар са кIвалах я ваз регьят,

Халкьдин патай еке гьуьрмет,

Лайихлу я ваз, Гьемдуллагь.

 

Пешеяр вак шумудни сад,

Аллагь калам я ви макьсад,

Сегьнедин вун хьана устад,

Культурадин рикI, Гьемдуллагь.

 

Кьудкъад йис я тамам,

Ви сагъламвал хьуй мад хуррам,

Къадимлу хьуй ви гьар са кам,

Гьуьрмет артух жез, Гьемдуллагь.

Тебрикдин сифте гаф Ахцегь райондин кьил Осман Абдулкеримова лагьана: — Гьемдуллагь Бабаева, Ахцегьрин лайихлу ксарин жергедай яз, гьабурун ирс, рехъ давамарзава. Халкьдик руьгь кутазвай, инсанар къени крарал желбзавай, вичел гьакъикъатдани тариф алай ихьтин ватанперес касдал чна вири­да дамахзава. Зун гьеле 6-классда авай чIа­валай Гьемдуллагь Минетуллаевичан сегьнедин къаматдал, яратмишунрал ашукь я. Зун гьамиша адаз са гьуьрметдай мумкин­вилихъ къекъвезвай. Къе ихьтин мумкинвал хьунал зун шад я. Халкьдин гьич са хийир-шийирдикайни хкечI тийизвай, райондин общественный уьмуьрда активнидаказ иштиракзавай, хъсан крарик къуьн кутаз алахъзавай Гьемдуллагь Бабаев Шарвилидин халис неве, баркаллу ахцегьви я. Чан сагъ, кефияр къумбар яз, халкь­диз шадвал гуз, вун хизандин кьилел ва халкьдихъ галаз яргъалди яша­миш хьун чи мурад я. За жуван ва хизандин, райондин руководстводин, вири районэгьлийрин патай квез юбилей мубаракзава, — тебрикдин гафарилай кьулухъ ада Гь.Бабаеваз Ахцегь муниципалитетдин Гьуьрметдин грамота ва пул­дин пишкеш гана.

РД-дин культурадин лайихлу работник, юбилярдихъ галаз яр­гъал­ йисара санал кIва­лахай Саид Эскерханова “Вун накь вучиз атаначир” мани тамамарна. Ахпа нубатдин гаф тамадади Ахцегьрин жуьмя-мис­кIиндин имам, райондин имамрин советдин председатель Абдулашим гьажи Абдулгьашумоваз гана.

—  Гьемдуллагь гьажи са культу­радин хилен ваъ, гьакI райондин динэгьлийрин дамахни я. Ахцегьа мискIинар ачухай сифте йикъалай ада вичин вири къуватар, устIар­вилин ала­кьунар анра къулайвилер арадал гъуниз серфзава. Инсан рекье-хуьле хъсандиз чир жеда лугьуда. Чаз санал Меккадиз гьаждал фин кьисмет хьана. Гьакъикъат­да­ни, акьалтIай зегьметкеш, дуьз, михьи, хъсан суьгьбетчи, муъмин кас я ам. Гьемдуллагьан гъилин ха­тIа­рин са ктаб диндиз талукь шииррикай ибарат я. Гьа ктабда гьатнавай  бейтер, назмаяр чна мавлидрик кIелзава. Квез Аллагьди хъсан­вилер, сагъ чан гурай! — алхишна ада.

Межлис бажарагълу манидар Фикрет Башировани РД-дин лайихлу артистка, республикадин Госпремиядин лауреат Рубаба Къурбановади “Гадани руш”, “Ватан Ахце­гьар” манийралди мадни гурлу авуна. Рахунрин арада кIелай вири шиирарни тамамарай манияр Гьемдуллагь Бабаеванбур, вичин вахтунда гьада тамамариз хьайибур тир. РД-дин культурадин лайихлу работникар тир Зульфия Велиевади (“Уьмуьр текдиз фидай туш”), Гьажи Агъаева (“Я ле-ле”), Расим Ибрагьимова (“Темпелдин фикирар”), манидарар  Эмирсултан Бигеева (“Зи Дагъустан”), Юнус Урдуханова (“Севдуьгуьм”), Исмаил Ризеханова (“Яргъи руш”) чпин манийралдини кьуьлералди ва Гь.Бабаеван “Къариба азар”, “Бахтавар” тамашайрай кIусар къалуруналди залдавайбурун гуьгьуьлар мадни шадарна.

Сегьнедилай юбилярдин тIвар­цIихъ тебрикдин хуш келимаяр райондин культурадин управленидин начальник Къистер Гъаниевадини ла­гьана. Ада идарадин ва коллективдин патай Гь.Бабаеваз гьуьрметдин грамота ва пишкешар гана. Ахцегьрин музшколадин директор Абдукерим Рагьимова, музейдин директор Агьмед Дагъларова, мярекатдин себебкардихъ галаз 1960-йи­салай кIвалахиз хьайи Алескер Искендеровани Аким Абдурагьимова, РД-дин муниципальный къуллугъдин лайихлу работник Насир Юз­бегова, аялрин яратмишунрин кIвалин муаллим Руслан Касарова, Хкемрин хуь­руьн школадин му­ал­лим Мая Гьажиевади, зегьметдин ве­­те­ранар ва чкадин шаирар тир Лга Энвера, Мейрам Къазибеговади, Асия Рагьимовади, Жамиля Гьажие­вади, Севинжи Муртузалиевади (абу­­ру чпин шиирарни кIел­на) ва масабуру Гьемдуллагь Бабаеван уьмуьрдайни сегьнедин кIвалахдай итижлу дуьшуьшар ри­кIел хкана, юбилярдиз чандин сагъвал, яргъи уьмуьр, рикIин динжвал хьун ал­хишна­.

Эхирдай Гь.Бабаева вичин тIвар­цIел атанвай вирибуруз чухсагъул лагьана. Мярекат, япара ши­рин манийринни хъуьруьнрин ван аваз, берекатлу суфрайрихъ яргъалди давам хьана.

Дашдемир Шерифалиев