ЦIийи Макьарал мукьвара хуьруьн культурадин кIвалин художественный руководитель, машгьур манидар ва музыкант, жуьреба-жуьре са шумуд фестивалринни конкурсрин лауреат Камилов Керим Камиловичан 70 йисан юбилейдиз талукьарнавай шадвилин чIехи мярекат кьиле фена.
Хуьруьн юкьвал алай межлисрин залда кьиле тухвай и мярекат “Сулейман-Стальский район” муниципальный райондин кьилин советник, юбилярдин хуьруьнви Мусаиб Агьмедова, райондин культурадин отделдин, культурадин дараматдин жавабдар къуллугъчийри, кIвалахдин рекьяй юлдашри, дустари, машгьур манидарри, юбилярдин багърийри иштиракна. Юбиляр тебрик авуналди, абуру няметривди безетмишнавай суфрайрихъ чкаяр кьуна. Музыкантри зал ширин сесерив ацIурна.
Микрофондихъ ЦIийи Макьарин культурадин кIвалин директор Нурали Велибегов гала. Межлисдиз атанвайбуруз — ЦIийи йис, Керим Камиловичаз юбилей тебрик авурдалай гуьгъуьниз ада Камилован уьмуьрдин рекьикай, музыкант ва манидар тир адан бажарагъдикай, агалкьунрикай, вичин дурумлу зегьметдалди, инсанвилин къилихралди халкьдин арада къазанмишнавай еке гьуьрметдикай суьгьбетна.
Керим Камилован иштираквални аваз “Кьасумхуьруьн далдамчияр” дестеди тамамарай “Дагъларин везинар” вирибуру гурлу капар ягъуналди къаршиламишна.
Межлис кьиле тухун машгьур тамада, РД-дин культурадин лайихлу работник Ярагьмед Ярагьмедова давамарна. Юбиляр ва межлисдин иштиракчияр тебрик авурдалай гуьгъуьниз ада гаф Мусаиб Гьажибалаевичаз гана. Тебрикдин гафарилай гуьгъуьниз ада райондин кьил Нариман Абдулмуталибован чухса-гъулдин чар кIелна.
Юбилярдин тIварцIихъ тебрикдин гафар райондин культурадин отделдин къуллугъчийри, хуьруьнвийри — отставкада авай полковник Магьсуд Магьмудова, шаирар Шагьабудин Шабатова, Мирземет Салманова, гьакIни райондин яратмишунардай интеллигенциядин, “Куьредин ярар” культурадин центрадин тIварунихъай лезги писателрин Союздин райондин отделенидин председатель Абидин Камилова ва масабуруни лагьана, пишкешар гана. Абуру юбилярдиз бахшнавай чпин шиирар кIелна. Абидин Камилова адаз и центрадин гьуьрметдин грамота, алай йисан юбиляр, шаир Мислимат Агьмедпашаевадин бахш шиирар авай цIийиз акъатнавай “Чи дередин кьегьалар я” ктаб, пулдин савкьат пишкешна.
Межлисдал Москвада ва Санкт-Петербургда яшамиш жезвай чи ватанэгьлийрилай юбилярдин тIварцIихъ хтанвай телеграммаярни кIелна.
Тебрикдин гафар рахуналди, гуьзел манияр лугьуналди ва кьуьлер авуналди Дагъустандин лайихлу артистри — Омар Меликова, Даниял Къазиева, Дагъустандин искусствойрин лайихлу деятель Рустам Къарибова, гьевескар манидарар Гуьльмира Алиевади, Мерзият Амахановади, кларнетчи — устад Женнет Римиева ва масабуру шад межлис мадни гурлу авуна.
Эхирдай юбилярди межлисда иштирак авур вири юлдашриз сагърай лагьана.
Мизамудин Магьмудов
