ТАСС-дин корреспондентди хабар гузвайвал, Дагъустандин Халкьдин Собраниди 2020-йисан доходрилай харжияр артух тушир бюджет тестикьарна.
“Налогрин ва налогар тушир доходрин умуми кьадар 2,6 миллиард манатдин артух хьана. Федеральный бюджетдайни 10,5 миллиард манат куьмек агакьда. Санлай къачурла умуми доходри 138,5 миллиард манат тешкилда. 2020-йис патал ийизвай харжийрин умуми кьадар 138,5 миллиард манат жеда”, — малумарна сессиядал РД-дин Халкьдин Собранидин бюджетдин, финансрин ва налогрин рекьяй комитетдин председатель Сейфулагь Исакьова.
Республикадин вице-премьер Гьажимегьамед Гьуьсейнова малумарайвал, 2020-йисан бюджетда неинки яшайишдин жигьетдай гудай, гьакI кьурулушар чкадал хкунизни харждай пулар жеда. Ида а кардин гьакъиндай шагьидвалзава хьи, республикадин инвестицийрин программайриз ва гьакI “Зи Дагъустан — Зи рекьер”, “Хуьрерин мулкар комплекснидаказ вилик тухун” программаяр кьилиз акъудун патални пулар чара ийида.
Бюджетдин проектдин бинедаллаз, 2020-йисуз республикадин инвестицийрин программадиз харждай пулари 14,1 миллиард манат тешкилда. И программадик кваз 302 объект, гьа гьисабдай яз 25 школа, аялрин 39 бахча, газдин сетрин 11, здравоохраненидин 4, спортдин 3, культурадин 1 ва агьалияр целди таъминардай 46 дарамат, имарат кардик кутада.
Гь.Гьуьсейнован гафаралди, кьве йисуз республикадин инвестицийрин программадиз харж авур финансрин кьадар 5,5 сеферда гзаф хьана. “Эгер 2018-йисуз чи республикадин инвестицийрин программадиз 1,67 миллиард манат пул атанайтIа, 2020-йисуз чна и программа 9,1 миллиард манатдин кьадарда аваз кьабулзава. Ихьтин мумкинвални чаз республикадин бюджетдиз къвезвай налогрин кьадар артух хьуни яратмишзава”, — лагьана Гь.Гьуьсейнова.
— 2020-йисуз “Зи Дагъустан — Зи рекьер” программадиз харжзавай пуларни гзафарда. Эгер 2019-йисуз и программа патал 770 миллион манат чара авунайтIа, алукьзавай йисуз и рекъем 1,2 миллиард манатдив агакьда. Имни транспортдин налог гзаф кIватIунихъ галаз алакъалу я, — къейдна Дагъустандин вице-премьерди.
«Лезги газет»
