Россиядин Силисдин комитетдин председатель Александр Бастрыкин Дагъустан Республикада мугьманвиле хьана. Идан гьакъиндай Россиядин Силисдин комитетдин сайтда хабар гузва.
Мугьманвиле авай чIавуз ам Дагъустан Республикадин Кьил Владимир Васильевахъ галаз гуьруьшмиш хьана. Абуру регионда криминогенный гьалар хъсанарунихъ ва экономикадин жигьетдай хатасузвал таъминарунихъ элкъуьрнавай, коррупциядиз акси серенжемрин барадай тухванвай кIвалахдин нетижаяр веревирдна. Александр Бастрыкина къейд авурвал, алай вахтунда Россиядин ФСБ-дин ва МВД-дин подразделенийрихъ галаз санал Кеферпатан Кавказдин регион криминалитетдин басрухдикай азад авунин жигьетдай активнидаказ кIвалах тухун давам жезва. Коррупциядин жуьредин тахсиркарвилер авунай Дагъустан Республикадин виликан хейлин чиновникар, гьакIни жуьреба-жуьре дережайрин тахсикарвилер авунай са жерге маса ксар уголовный жавабдарвилиз чIугунва.
Владимир Васильева республикадин агьалийрин хушбахтвал патал гьар йикъан кIвалах тухунай Россиядин Силисдин комитетдин къуллугъчийриз сагърай лагьана. Ада гьакIни къейд авурвал, Россиядин Федерациядин Силисдин комитетди туькIуьрнавай кадетриз чирвилер гунин Концепциядал — Россиядин Федерациядин Силисдин комитетдин председателди 2018-йисан 29-майдиз тестикьарай Концепциядал асаслу яз, “Республикадин образованидин центрадин” бинедаллаз, 2020-йисан сифте кьилера Дагъустан Республикада Россиядин Федерациядин Силисдин комитетдин кадетрин класс тешкилун фикирдиз къачунва. 9-класс куьтягьнавайбурун жергедай 19 кас хкянава. Кадетрин школа Кеферпатан Кавказда виридалайни чIехиди ва алай аямдин истемишунрихъ галаз кьазвайди я. Ана алай вахтунда 1500-далай виниз аялри чирвилер къачузва.
Вичин нубатдай яз, Александр Бастрыкина Дагъустан Республикада тахсиркарвилерихъ галаз женг чIугунин карда куьмекар гунай региондин Кьилиз сагърай лагьана ва республикада къанун-къайдадал амал авунихъ рекье тунвай кIвалах давамардайдахъ инанмишарна. Россиядин Силисдин комитетдин системада кадетрин гьерекатдиз куьмек гунай ва ам вилик тухунай Россиядин Силисдин комитетдин председателди разивилин кьетIен келимаяр лагьана.
Ахпа Александр Бастрыкин къуллугъдин везифаяр тамамардайла телеф хьайи Силисдин комитетдин къуллугъчийрин багърийрихъ галаз гуьруьшмиш хьана. Ада, чпин чанарни хаталувилик кутуна, законлувилин ва адалатлувилин ивирар хвейи лайихлу ва викIегь ватандашар тербияламишунай сагърай лагьана. Телеф хьайи къуллугъчийрин хизанриз датIана фикир гунай ва куьмекдин гъил яргъи авунай мугьманри разивилин келимаяр лагьана. Александр Бастрыкина телеф хьайи къуллугъчийрин хизанриз ведомст-водин патай датIана куьмекар гудайдахъ инанмишарна ва ада гьакIни абуруз алукьзавай ЦIийи йис мубаракна, хушбахтвал, кьилел ислягь цав хьун алхишна.
Россиядин Силисдин комитетдин председателди Россиядин Силисдин комитетдин председателдин заместитель Игорь Краснован, Россиядин Федерациядин Силисдин комитетдин Кеферпатан Кавказдин федеральный округда авай Силисдин Кьилин управленидин ва Россиядин Силисдин комитетдин Дагъустан Республикада авай Силисдин управленидин руководстводин, къуллугъчийрин иштираквал аваз совещанини тухвана. Анал 2019-йисан алатнавай девирда ведомстводин къурулушри тухвай кIвалахдин нетижаяр веревирдна, Дагъустан Республикадин мулкарал дараматар ва инженерный къурулушдин имаратар маса къачун, эцигун ва цIийикIа туькIуьр хъувун патал чара авунвай бюджетдин такьатар чуьнуьхуниз, Россиядин ФСИН-дин Калмыкия Республикада авай управленидин 2-ИК-дин мулкунал террористрин десте тешкилуниз, кьиле А.Гагиев аваз хьайи тахсиркарвилин дестедин членриз талукь яз къарагъарнавай уголовный делойрай силис кьиле физвай гьалдин ва и кIвалахдин нетижайрин патахъай гайи малуматрихъ яб акална.
Совещанидин нетижаяр кьуналди, Александр Бастрыкина уголовный делойрай гъиле-гъил аваз, вири терефар вилив хуьналди, ерилудаказ силис тухунихъ рекье тунвай тайин тир тапшуругъар гана.
“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, Махачкъаладин аэропортуна Александр Бастрыкин Дагъустандин Кьил Владимир Васильева къаршиламишна. Гьа ина кьиле фейи гуьруьшдин сергьятра аваз республикада законлувал ва къанун-къайдадал амал авун, гражданрин ихтиярар хуьн таъминарунин барадай санал кIвалахунин месэлаяр веревирдна.
Гуьруьшдин эхирдай Александр Бастрыкина Владимир Васильевав Ватандин ЧIехи дяведа Гъалибвилин 75 йис тамам хьуниз талукьарнавай медаль вахкана. Идалай гъейри, РФ-дин Силисдин комитетдин хиве тунвай везифаяр кьилиз акъудунин карда куьмек гунай Дагъустандин Кьилиз ведомстводин “Лайихлувилерай” медални ганва.
«Лезги газет»
