Лезгийрихъ алакьунар авай художникар, декоративно-прикладной искусстводин магьир устадар гзаф авайдакай чна са шумудра лагьана. Ватандивай яргъара авай бязи художникрикай, тимталчийрикай макъалаярни кхьена, чин тийизвай лезгийризни бажарагълу векилрикай малуматар раижна.
Алай вахтунда Чечняда яша-миш жезвай ва ана кIвалахзавай кьурагьви Аслан Абдуллаев неинки художник, кIарасрикай нехишар авай гуьрчег затIар туькIуьрзавай устад, гьакI халкьдин милли месэлайрихъ рикI кузвай ватанперес векилни я.
Аслан Абдулагьович Абдуллаев 1965-йисуз Кьурагьа къуллугъчийрин хизанда дидедиз хьана. Хуьруьн мектебда 8-класс куьтягьайдалай кьулухъ ам Махачкъаладин художественный училищедин кIарасдикай нехишдин затIар туькIуьрдай отделенидик экечIна. Анаг куьтягьай жегьилди Кьурагьрин медениятдин отделда художниквиле кIвалахна. Армияда аскервилин буржи кьилиз акъудна хтайдалай кьулухъ бажарагъ авай жегьилди чирвилер мадни артухарунин макьсад вилик эцигна. ИкI, ам Махачкъалада пединститутдин художественно-графический факультетдик экечIна. Гуьгъуьнлай ам кIарасдикай гуьрчег, нехишлу затIар туькIуьрунал машгъул хьана. Адан кIвалахрикай, алакьунрикай “Дагъустандин художникар” ктабдани малуматар гьатнава. КIарасдикай туькIуьрнавай мешреблу гуьзгуьяр, гурарин кьилер, суьрегьияр ва маса затIар раижуналди, ада республикадин дережадин выставкайрани иштиракзава. Ватанэгьлидин бажарагълувилинни устадвилин нетижайри вирибур гьейранарзава.
Ам халкьдин тарих, меденият хъсандиз чизвай, вичин хайи хуьруькай тарихдин делилар, хкетар, мисалар ва маса чешмеяр кIватIунални машгъул кас я. Ада устадвилелди чIугунвай Етим Эминан суьретдикай яратмишзавай векилри чпин ктабра ва маса чешмейра менфят къачузва.
Студент тир йисара ада институтдин залда кьве сеферда лезги шииратдинни манийрин мярекатар кьиле тухвана. Ана чи гзаф шаирри, журналистри ва масабуру иштиракна.
Асланан буба Абдулагь Айдумович Кьурагь райондин паспортдин столдин начальник тир, диде Халум Ибрагьимовна — ЗАГС-дин отделдин заведующий.
Зи рикIел хъсандиз алама, саки цIуд йис идалай вилик Аслан Абдуллаева интернетдин “Зи лезги халкь” форумда лезги эдебиятдин классик Етим Эминаз Дербентда памятник эцигунин месэла къарагъарнай. Эминаз хьаначтIани, са кьадар чIавалай къадим шегьерда Лезги госмуздрамтеатрдин дараматдин вилик квай паркуна СтIал Сулейманаз памятник хкажна.
Аслан Абдуллаеван хизанда са рушни гада чIехи хьанва. Хци ДГУ-дин математикадинни информатикадин факультет куьтягьнава. Исятда ада вичин хсуси видеостудия кардик кутунва. Руша Волгоград шегьердин мединститутдин 5-курсуна кIелзава.
Пешекар устаддихъ, ватанперес инсандихъ, адан хизандихъ сагъвал ва агалкьунар хьурай!
К.Ферзалиев
