Чи багъри «Лезги газетдин» виш йисан юбилейдин вилик адан кIвалахдикай мухбирар тир Нариман Къарибован, Агьмед Агьмедагъаеван, Шихали Багъирован, Вадим Жамалдинован, Райсудин Набиеван, Абдулашим Рамазанован ва масабурун макъалаяр акъатна. Заз абур вири гзаф бегенмиш хьана. Газет кхьиниз талукь яз ва адан кIвалахдикай жуван фикирар зазни лугьуз кIанзава. Зи сад лагьай макъала газетдиз (а вахтунда “Коммунист” тир) 8-классда кIелзавайла, ученикрин производственный бригададикай 1963-йисуз акъатнай. Адалай гуьгъуьниз Ленинан, “Знак почёта” орденрин сагьиб, кIвенкIвечи бригадир Гьасаналиев Эмиракай, Россиядин лайихлу муаллим, школадин директор Нуралиев Абубакаракай, Ватандин ЧIехи дяведин ветеран, подполковник Асваров Жаферакай ва масабурукай — очеркарни. За гьа 1963-йисалай газет гьар йисуз кхьинни ийизва, макъалаярни кхьизва ва кьиляй-кьилиз кIелни ийизва.
Машаллагь, газет югъ-къандавай итижлу жезва, гьар жуьредин рубрикайрик кваз итижлу макъалаяр гзаф акъатзава. Мажиб тIимил ятIани, газетдин къуллугъчийри намуслувилелди кIвалахзава. Чна юбилейдин йисуз газетдин тираж 15 агъзурдалай алудиз чалишмишвална кIанда.
Газетдин 45-нумрада кьилин редактор Мегьамед Ибрагьимова «Жуван пайни кутур» макъалада газетди халкьдин уьмуьрда гьихьтин чка кьазватIа кхьенва. Газетди халкь сад ийизва, агудзава. И кардин жигьетдай газетдин кьилин редактордин заместитель Куругъли Ферзалиева 12-чина патара авай лезгийрикай кхьизвай куьруь макъалайри иллаки шагьидвалзава. Пата-къерехра кIвалахзавай бизнесменри гьарда вичин хуьруьнвийриз са 10-20 газет кхьенайтIа, хъсан жедай.
Лезги чIал хуьнин ва еримлу авунин карда школадихъ галаз санал газетдини еке роль къугъвазва. Гьаниз килигна лезги чIалан гьар са муаллимди лезги газет кхьинал, аялри ам кIелунал гуьзчивална кIанда.
Чи милли, багъри газетдин 100 йисан юбилей чи вири халкьдин сувар, тарихдин зурба вакъиа я. Гьуьрметлубур, ша чна вирида жуван милли газет кхьин, жуван вацI чна чIехи ийин!
Тади къачу кхьиз, дуст, “Лезги газет”
“Лезги газет” кIелайди уях жеда,
Таяр галаз адав лап дамах жеда,
Гуьгьуьларни адан лап къаврах жеда,
Тади къачу кхьиз, дуст, “Лезги газет”.
“Лезги газет” чахъ авай са яракь я,
Куьмек тагун чи патай лап шандакь я,
КхьизвачтIа, вун лап халис мутIлакь я,
Тади къачу кхьиз, дуст, “Лезги газет”.
Сулейман Пашаев,
Советский хуьр
