Сулейман-Стальский райондин сергьятда авай вири хуьрериз тIебии газ гъанва. Виликрай райондин хуьрера вирида кIвалера цIай кIарасрикай хъийизвай. Алай вахтунда тIебии газдин линияр гъуникди кIарасар саки ишлемишзавач. Гьа са вахтунда газдини агьалийрин рикIер акьван шадарзавач. Кьве йикъалай са юкъуз, линияр ремонтзава лугьуз, газ хкудзава. Гуьгъуьнлай газдин пичер кутун хъувурла, са арадалди, гьакIан гьава къвезва. И вахтунда счетчикри илигна кIвалахзава.
Идалайни гъейри халкьдин кьил элкъуьриз, Махачкъаладай, Пятигорскдай, квел газ кунай 10-15 агъзур манат пулар буржар ала лугьуз, чарарни хквезва.
Ихьтин къайдасузвилиз фикир гана, садани герек серенжемар кьабулзавач. Бурж хьунихъ вичин себебар хьун герек я эхир. Агьалиди, почтада, я тахьайтIа газдин идарада квитанциярни къачуна, пул гузвайди я. Газдин идарадин сагьибри, компьютерда куьне пул ганач лагьана къалурнава лугьуз, инжиклу ийиз, суд-дуванра твазва. И карди райондин яргъал хуьрерай къвезвай агьалияр инжиклу ийизва. Компьютердиз пул ни янатIа, вучиз ам ана авачтIа, жаваб гьа касди гун герек я. Адалайни гъейри, кьезилвилер авай муаллимри, медработникри йисан эхирдай социальный идарадиз газдин идарадай справкаяр къачуна кIанзава. Анани йисан эхирдай алтIушна, са шумуд сятера гъарикI хьана, рикIинрихъ галамукьзава. Эгер вуна социальный идарадиз справкаяр тухун тавуртIа, ви кьезилвилер атIузва. КIвале куьмек авачир яшлу инсанар мекьи вядеда яргъал хуьрерай рекьерин харжиярни гана атайла, кIвалахни туькIуьн тавуна, нарази яз хъфизва. Газдин идарадин сагьибриз ви кIвалах туькIвенани, туькIвеначни гьич къайгъуни туш.
Гьа икI давам жез са шумуд йис я. Къайдасузвилерал, татугайвилерал бес эхир эцигун лазим тушни?!
Вадим Жамалдинов
