8-декабрдиз Сулейман-Стальский райондин Сардархуьруьн А.Алимован тIварунихъ галай спорткомплексда, са шумуд сеферда дуьньядин чемпион, РФ-дин лайихлу тренер ва спортдин мастер Къазимегьамед Агьмедован экуь къамат рикIел хкунин лишан яз, дзюдодай республикадин дережадин турнир кьиле тухвана. Ана чи республикадин районрай, гьакI Азербайжандай тир, 2008-2010-йисара дидедиз хьанвай 200-дав агакьна жаванри иштиракна.
Дагъустандин физический культурадин ва спортдин министерстводин календарда къалурнавай акъажунар гила кьвед лагьай сеферда Сулейман-Стальский районда кьиле тухуни чкадал и турнир тешкилзавай дуьньядин чемпион Тельман Къурбанова санлай районда спортдин и жуьре вилик тухуниз артух фикир гунин гьакъиндай шагьидвалзава.
Къейд авун лазим я хьи, турнирдин багьа мугьманрин арада спортдин кесерлу майданра устадвал къалурнавай ксар, РФ-дин лайихлу тренерар, спортдин международный классдин, гьакIни Россиядин спортдин мастерар авай. Алатай йисуз хьиз, цIини турнир вини дережада кьиле фена. МР-дин кьил Н.Абдулмуталибова лазим тир вири жуьредин куьмекар гана.
Къизгъиндаказ кьиле фейи бягьсерин нетижада Сулейман-Стальский райондай тир 3 спортсмен — Адам Рустамов (25 кг), Давид Рамазанов (42 кг) ва Гьажимурад Къурбанов (60 кг) — къизилдин медалар къазанмишуналди, 1-чкадиз лайихлу хьана. 2 ва 3-чкаяр, талукь тирвал, Дербент шегьердин ва эхиримжи вахтунда викIегь камаралди вилик физвай Агъул райондин дзюдоистри кьуна.
Районда республикадин дережадин турнир хъсан тешкиллувал аваз кьиле тухунай райондин кьил Н.Абдулмуталибов ва тренер, тешкилатчи Т.Къурбанов РД-дин дзюдодин федерациядин патай махсус пишкешриз лайихлу хьана.
Мизамудин Магьмудов
