Гару Докъузпара райондин хуьрериз еке зиянар ганва
Эхиримжи 30 йисуз Докъузпара районда лап къати гарар акъатунин дуьшуьшар гзаф хьанва. Гару дараматрин къавар алудзава, багълара авай тарар, симин тарар ярхарзава ва маса зиянар гузва. ТIебиатдин и завалди Къаракуьре, ЦIийи Къаракуьре, Усухчай, Мискискар, Миграгъ-Къазмаяр, Миграгъ, Къалажух, Къуруш, Текипиркент хуьрерин агьалияр гьелекзава.
ЦIийин йисузни гару и райондилай гъил къачунач. ИкI, 28-30-октябрдиз акъатай тIурфанди вири райондиз лап еке зиянар ганва. ЦIи электропередачайрин 1970-1971-йисара тухванвай куьгьне электропередачайрин линийриз иллаки чIехи зиянар хьанва. Абур цIийибуралди эвездай вахт лагьайтIа фадлай алукьнавайди тир. Хьанвай зиянрин кьадар пешекарри тайинарун герек я.
Гьа икI, Докъузпара районда акъатай тIурфанди 7-8 километрдин мензилда электрикдин линияр къайдадикай хкуднава, симер кьатIнава. Гару бетондин даяхарни галаз 34 симин тар ханва ва ярхарнава. И жигьетдай Къаракуьре хуьруьз хьанвай зиянар иллаки екебур я. Ина 1970-йисара акIурай куьгьне хьанвай 11 симин тар цIийибуралди эвездай вахт фадлай алукьнава. 5700 метрдин гзаф гужлу токдин симерни ремонт авунин чарасузвал арадал атанва.
Лагьана кIанда хьи, Докъузпарадин сетдин участокдин чIехи мастер Нисредин Эмирбегова гъиле-гъилди серенжемар кьабулунин, гьакIни райондин кьил А.Алискерова куьмек гунин нетижада къайдадикай хкатнавай электропередачайрин линияр гуьнгуьна хтун патал герек тир такьатар жагъурнава. Алай вахтунда вири районда электрикдин ток физвай симер чIугунвай 34 шалман акIур хъувун, 8 километрдив агакьна мензилда гзаф гужлу токдин симер чIугун герек къвезва. И кIвалахар гъиле кьунва. Лагьана кIанда хьи, Къаракуьредин агьалияр са гьафтеда эквер амачиз амукьна.
Ихьтин гьал арадал атун “Дагъустандин сетевой компания” АО-дихъ галаз алакъалу авун герек я. И идаради электропередачайрин линияр къайдадик кваз хуьн патал тIуб-тупIални эцигзавач. Халкьдивай кIватIзавай пул лагьайтIа, дагълух районрин электропередачайрин куьгьне линияр гуьнгуьна аваз хуьн ва я тахьайтIа куьгьне трансформаторар цIийибуралди эвез авун патал серфзавач, са гьихьтин ятIани малум тушир маса рекьериз харжзава.
Трансформаторар, шалманар, гзаф гужлу ток тухудай симер ва маса тадаракар районди ахъайзавай пулдин такьатрихъ маса къачуз сад лагьай сефер туш. Гьакъикъатда лагьайтIа, им “Дагъустандин сетевой компания” АО-дин хиве авай везифа я.
И сефердани къаракуьревийри “Дагъустандин сетевой компания” АО-ди ва я тахьайтIа республикадин властдин къурулушди куьмек гуник ваъ, чпин ватанэгьли Сулейман Керимова куьмекдин гъил яргъи авуник, адан куьмекдалди хайи хуьре 1970-1971-йисара чIугур электропередачайрин кьилин линияр цIийикIа туькIуьр хъувуник умуд кутазва.
Эдуард Гьажибегов
