ОКТЯБРДИН ИНКЪИЛАБДИН — 100 йис
7-ноябрь. Республикадин Дуствилин кIвалин гегьенш зал сив-сивди инсанрив ацIанвай. Ина ЧIехи Октябрдин социалистический революциядин 100 йис тамам хьуниз талукьарнавай мярекат кьиле фена. Хорди “Интернационал” тамамардайла, вирида адахъ, кIвачел акъвазна, яб акална. Трибунадихъ атай КПРФ-дин Дагъустандин отделенидин сад лагьай секретарь, РД-дин Халкьдин Собранидин вице-спикер Магьмуд Магьмудова кIватI хьанвайбуруз юбилей мубаракна, 1917-йисан октябрди вичин кьилин метлебар ислягьвал, зегьмет, рейсадвал, халкьарин дуствал, барабарвал, стхавал тир цIийи девир башламишайди къейдна.
— Дуьньядин картадал цIийи уьлкве — виче гьукум садвал, умумивал патал экъечIзавай зегьметчи инсанди кьур СССР — пайда хьана, — давамарна М.Магьмудова. — Агъзурралди цIийи заводар, фабрикаяр арадал гъун, савадсузвал терг авун, цавун бушлухриз экъечIун… — Советрин уьлкведин ихьтин зурба агалкьунри вири дуьнья гьейранарна. Октябрдин идеяйри Мао Цзе-Дун, Хо Ши Мин, Фидель Кастро, Че Гевара Уго Чавес ва гзаф маса ксар руьгьламишна. Са жерге уьлквеяр социализмдин бинейраллаз цIийи общество туькIуьриз эгечIна, къенин юкъузни гьа рекьяй виликди физва. Китайдин Халкьдин Республикадин, стха Белоруссиядин тежрибади, агалкьунри гзаф крарикай лугьузва…
Мярекатдал рахай РД-дин Гьукуматдин Председателдин сад лагьай заместителдин везифаяр вахтуналди тамамарзавайди тир Анатолий Къарибова 1917-йисан октябрь дуьньядин тарих виликди фин ва инсанрин кьисметар дибдай дегишарай вакъиа хьайиди, Россия цIийи, муракаб рекьяй фейиди, Дагъустандин автономиядин тарих башламиш хьайиди къейдна. Революция жедалди Дагъустан кьулухъ галамай, экономика зайиф, культурадин дережа агъуз субъект тир. Советрин властдин йисарин дегишвилери республика яшайишдинни экономикадин жигьетдай виликди финин еришриз зурбаз таъсирна.
Мярекатдал са жерге активистрив юбилейдин медалар, комсомолдин жергейриз цIийиз кьабулнавай жаванрив билетар вахкана. Яратмишунрин коллективри ва ансамблри чпин устадвал къалурна.
* * *
“Октябрдин революциядин 100 йис” медалриз партиядин активистар яз хьайи, чпи яргъал йисара Октябрдин инкъилабдин идеяяр печатда пропаганда авур, “Лезги газетдин” тежрибалу журналистар тир Шихмурад Шихмурадов ва Мердали Жалиловни лайихлу хьана. Абурув медалар Махачкъала шегьердин Советский райондин Яракьлу Къуватринни законар хуьдай органрин ветеранрин Советдин председателдин заместитель, полковник Нисрет Исмаилова вахкана. Мубаракрай!
Шихмурад Шихмурадов
