“Россия 1” телеканалда “Аламатдин инсанар” проектдин кьвед лагьай сезон ачухнава. Адан иштиракчийри чпин тажубардай хьтин алакьунар къалурзава. КцIарай тир 6 йиса авай лезги Руслан Сафаровакайни и шоудин иштиракчи хьана. Ада тамашачияр ва жюридин членар математикадай вичин надир алакьунралди гьейранарна.
Ада вич “инсан-калькулятор” яз гьисабзава ва программистдин пеше къачуникай фикирзава.
Руслан Сафарова вичин вилик эцигай вири тапшуругъар са гъалатIни квачиз тамамарайла, жюридин членар тажуб хьана амукьна.
Финалда Русланаз мадни четин тапшуругъар гана. Амма аламатдин алакьунар авай лезги аялди абур са рехнени квачиз кьилиз акъудна. Нетижада Руслан Сафарова гьуьрметдинди тир 4-чка кьуна, “Аламатдин инсанар” проектдин гъалибчи 23 йисан яшда авай Роман Страховакай хьана.
«Лезги газет»
