2019-йисан 28-ноябрдиз къурушвийрив яргъалди чIугур азардик лезгийрин машгьур писатель, Ватандин ЧIехи дяведин иштиракчи, инвалид Къазиев Искендер Аликберович рагьметдиз фена лагьай чIулав хабар агакьна.
И.А.Къазиев 1924-йисуз Ахцегь райондин Чеперин хуьре дидедиз хьана. ГъвечIи чIавалай ада шиирар, гьикаяяр кхьидай, таяр-туьшерин арада саздихъ галаз маниярни лугьудай. Гуьгъуьнлай ам пешекарвилелди гьикаяяр кхьинал машгъул хьана. Къелемдин сифте “бегьерар” тIебиатдин аламатрикай, гьайванрикай, ничхиррикай тир. ЦIикьвед йиса авай, И.Къазиеваз, Етим Эминан, СтIал Сулейманан, Хуьруьг Тагьиран ва маса шаиррин цIудралди шиирар хуралай чидай. Гьакьван рикI алай жавандин хайи эдебиятдал.
Писателдин гъиликай хкатнавай эсеррикай виридалайни чIехиди “Смоленскдин чилел” тIвар алай роман я.
Искендер Къазиев аламатдин — шадвилинни пашманвилин легьзейрив ацIай уьмуьр акур кас тир. Аял чIавалай зегьметдин къадир чир хьайи ада вичин уьмуьр баркаллувилелди кьиле тухвана. Ватандин ЧIехи дяве гатIунайла, И.Къазиев вичин хиве авай пак буржи тамамариз фена. Ада дяведин сифтедилай эхиримжи йикъалди душмандихъ галаз кьиле фейи къати женгера иштиракна. Дирибаш хци Смоленскдин чилерал кьиле фейи ягъунрани иштиракна. Са шумуд сеферда адал залан хирерни хьанай. Дяведилай кьулухъ ада вичин пеше — писателвал давамар хъувуна.
Искендер Къазиев, бажарагълу писатель хьиз, инсанрин ихтиярар хуьдай ватанпересни яз (правозащитник) машгьур тир. Ада лезги халкь кьве патал паюникай, абурун кьадар-кьисмет сад хъувуникай са шумуд сеферда Азербайжандин властриз, КПСС-дин ЦК-дизни адан Секретариатдиз арзаяр кхьенай. Гьикьван кхьенайтIани, гьукум гъилевайбуру яб ганачир, акси яз, ам дустагъра туна, гьатта адан чандиз къаст ийизни алахънай. Душмандилай алакь тавур крар, масабуруз адан кьилел гъиз кIан хьанай. Вични - са тахсирни квачиз. Гьикьван йисар, асирар алатайтIани, Искендер Къазиев хьтин халис ватанпересдин руьгь авай инсанар тарихдай квахьдач.
“Лезги газетдин” редакциядин коллективди Искендер Аликберович Къазиеван мукьва-кьилийриз, ярар-дустариз башсагълугъвал гузва. Адан крар, яратмишунар чи рикIера яргъал йисара амукьда.
