Дагъустандин халкьдин шаир Байрам Салимован — 90 йис
И йикъара Махачкъалада, Шииратдин театрдин дараматда, Дагъустандин халкьдин шаир Байрам Салимов дидедиз хьайидалай инихъ 90 йис тамам хьуниз талукьарнавай мярекат тешкилнавай. Адаз “Вучиз, чуьнгуьр, вуна зун жагъурзава виринра?..” тIвар ганвай.
Байрам Наврузбегович Салимов 1929-йисан 5-майдиз Азербайжан Республикадин кьакьан дагъдин СтIуррин хуьре дидедиз хьана. Адан сифте шиирар гьеле мектебда ва гуьгъуьнлай военный училищеда кIелдай йисара газетризни журналриз акъатзавай. 1955-йисуз “Дуствал” альманахда Б.Салимован “Муьгьуьббатдин рекьел цацар” тIвар алай сад лагьай поэма чапна.
Шаирдив чIехи машгьурвал адан эсерар Вирисоюздин “Крокодил” журналда ва “Литературная газетада” акъатайдалай кьулухъ агакьна.
Адан къелемдикай шиирринни поэмайрин 20-далай виниз ктабар хкатнава. Урус чIалал адан ктабар Махачкъалада, Москвада, Бакуда, Алма-Атада чапдай акъатна. Таржумачи яз, Б.Салимова Коста Хетагурован, Расул Гьамзатован ва гзаф маса авторрин эсерар лезги чIалаз элкъуьрна.
Б.Салимов хъсан гьикаятчи, драматург, фольклорист язни машгьур я. Забит Ризвановахъ галаз санал ада кIватI хъувур игитвилин эпос “Шарвили” къе вири халкьди кIелзавай зурба эсер я. Адан бинедаллаз къадим Ахцегьа Шарвилидин сувар кьиле тухуз 20 йисалай гзаф вахт алатнава.
Шаирди милли культура ва литература вилик тухуник кутунвай лайихлу пай гьисаба кьуналди, адаз “РД-дин культурадин лайихлу работник” ва 1999-йисуз “Дагъустандин халкьдин шаир” лагьай гьуьрметдин тIварар гана.
2014-йисуз, 86 йисан яшара аваз, ам чавай гьамишалугъ яз къакъатна. Шаир Махачкъалада мусурманрин сурара фаракъатнава.
Байрам Салимов рикIел хкунин мярекат РД-дин писателрин Союздин председатель Мегьамед Агьмедова ва лезги писателрин секциядин руководитель Владик Батманова кьиле тухвана. Шаирдикай чпин фикирар лугьуз, мярекатдал адан хейлин дустар, санал кIвалахай ксар, алимар, искусстводин деятелар, багърияр рахана. Абурун жергеда ДГУ-дин профессор Гьажи Гашаров, РФ-дин искусствойрин лайихлу деятель, композитор Мегьамед Гьуьсейнов, “Лезги газетдин” кьилин редактор, шаир Мегьамед Ибрагьимов, Лезги радиодин кьилин редактор Наира Рамазанова ва масабур авай.
Шаирдин эсерар Махачкъаладин школьникри ва студентри устадвилелди кIелна. “Суна чан” ансамблдин векилри ва кьилди лезги манидар Миголь Маринади шаирдин чIалариз кхьенвай хейлин манияр тамамарна.
Шииратдин мярекат тешкилайбур РД-дин писателрин Союздин лезги секция ва Лезги радио я.
Чи мухбир
