Сахель Африкадин чIехи къумлух Сахарадин къерехда авай регион я. Вилик вахтара чкадин агьалийри и магьалда сергьят алай цин ресурсар жавабдарсузвилелди ишлемишиз хьана. Нетижада ана еке кьурагьвилер ва каш арадал атана. Инсанрин яшайиш патал анаг хаталу чкадиз элкъвена, 1972-1984-йисара лагьайтIа, Сахель магьалда, кьурагьвал себеб яз, 100 агъзурдалай гзаф инсанар кьена.
“Сахель” гафунихъ (араб чIалай таржума авурла) “къерех” ва я “часпар” лагьай мана ава. 2014-йисалай Сахелдиз талукь тир международный региональный “Сахельский пятерка” кIватIал кардик ква, аник Буркина-Фасо, Мавритания, Мали, Нигер ва Чад акатзава.
А чка гзафни-гзаф ачух майданри, кул-кусри кьунва, бязи чкайра тамар-тарар ава. Сахелдин гьайванрин алемдикай рахайтIа, абурун кьадарни ана тIимил туш. Нек хъвадай, векь недай гьайванрилай гъейри, ана йиртижи гьайванарни (лекьенар, асланар, къаракъулах хьтин кицIер) гьалтда. Алатай ва и асирра гъуьрчехъанвилин хилел са артух гуьзчивал тухузмачирвиляй ана тIебиатдин, гьайванрин жуьреба-жуьревал зайиф ва тIимил жезва, бязи гьайванар гьатта терг хьанвайбур яз малумарнава.
Сахелдин четин месэла накьв ва яд бес тахьунихъ галаз алакъалу я. Анин накьв асул гьисабдай куьлуь къум хьтинди, азот ва фосфат лап тIимил квайди я.
«Лезги газет»
