26-ноябрдиз “Дагъустан” РИА-дин майдандал “Газпром трансгаз Махачкала” ООО-дин генеральный директор, “Газпром” ПАО-дин гьуьрметлу работник Александр Астанин республикадин СМИ-рин векилрихъ галаз гуьруьшмиш хьана. Мярекат кархана арадал атайдалай кьулухъ 40 йис тамам хьуниз талукьарнавайди тир.
Арадал атай чIавалай инихъ алатнавай 40 йисан девирда гъвечIи ва зайифдаказ таъмин тир кархана Дагъустандин кудай шейининни энергетикадин комплексдин зурба карханадиз элкъвенва. Къенин юкъуз “Газпром трансгаз Махачкала” ООО “Газпром” ПАО-дин 100 процентдин идарадик квай кархана я. Ада Дагъустандин ва Кеферпатан Кавказдин республикайрин ва крайрин агьалияр тIебии газдалди таъминарзава. Карханади гьар йисуз 11 миллиард кубометрдилай виниз газ санай масаниз рекье твазва.
Къенин юкъуз “Газпром трансгаз Махачкала” ООО-дин къурулушдик 12 филиал, гьа жергедай яз магистральный турбайрин 5 управление, гьакIни аварийрин ва гуьнгуьна хутадай кIвалахрин управление, инженервилинни технический, чирвилеринни производстводин центраяр ква.
Карханадин тарих 1979-йисалай башламиш жезва. Алай вахтунда “Газпром трансгаз Махачкала” ООО-дин генеральный директордин советник, и хилен лайихлу ветеран, къастунал кIеви кас Насрутдин Насрутдинован еке зегьметдин нетижа яз, 1979-йисуз Махачкъалада газдин магистральный турбайрин ЛПУ арадал гъанай, гьа и йисуз адан тIвар дегишарнай ва Дагъустандин ЛПУМГ хьанай.
Алатай асирдин 80-йисара Дагъустандин мулкунилай газдин “Моздок-Къазимегьамед” ва “Макат-Кеферпатан Кавказ” магистральный турбаяр тухванай, Избербаш ва Къизилюрт шегьерра компрессорный станцияр ишлемишиз вахканай. 90-йисарин эхирра ва 2000-йисарин эвелра газдин магистральный “Къумли-Аксай” турба, газ алцумдай “Аксай”, “Къумли” ва “ЦIийи Филер” станцияр ишлемишиз вахканай.
А.Астанина хабар гайивал, къенин юкъуз “Газпром трансгаз Махачкала” ООО-дин коллектив тахминан 1800 касдикай ибарат я. Иник, ада къейд авурвал, республикадин дагълух районра кIвалахзавай-бурни акатзава.
Алатнавай 40 йисан вахтунда карханадин коллективдиз жуьреба-жуьре четин шартIара кIвалахунни кьисмет хьана. Кьилди къачуртIа, республикадин газотранспортный къурулушда террориствилин серенжемрин нетижаяр арадай акъудай вахтарни (1993-йисалай 2004-йисалди абурун кьадар 26-дав агакьна), газдин магистральный “Къумли-Аксай” турба туькIуьрдайла (Дагъустан дурумлудаказ тIебии газдалди таъминарунин замин), арадал атай еке четинвилерни,Ботлих районда виридалайни кьакьанда авай ва технический жигьетдай муракабди тир газдин “Ботлих” турба-отвод эцигунни (ада дагълух районар газламишуниз рехъ ачухна) кьисмет хьана. Ада гьакIни агъзурралди агьалияр хаталувиликай хкудун патал “Моздок-Къазимегьамед” турба Махачкъаладин кеферпата кIвалер эцигзавай чкадилай масаниз акъудай вахтни рикIел хкана.
Александр Астанина хабар гайивал, ООО-да пешедин рекьяй чирвилер датIана артухарунин къайда кардик ква — карханадин чирвилер гунин ва производстводин центрада 1000 пешекарди чирвилер артухарзава.
Ина пешекаррин ва рабочийрин арада “Пешедай виридалайни хъсанди” конкурс кьиле тухузва, гъалиб хьайибур “Газпром” ПАО-дин фестивалриз рекье твазва.
Пешекарвилин устадвал къалурдай конкурсри, адан гафаралди, мадни еке дережайрив агакьдай, и хиле кIвалахзавай ксариз чпин чирвилер ва алакьунар ахтармишдай мумкинвал ачухзава.
Ихтилат компанияди мергьяматлувилин рекьяй ийизвай крарикайни фена. ИкI, руководителди гьисабзавайвал, “Газпром трансгаз Махачкала” — им РД-дин мулкунал мергьяматлувилин рекьиз виридалайни гзаф такьатар серфзавай кархана я. Аялрин, яшайишдинни культурадин идараяр, инвалидрин ва женгинин гьерекатрин, ветеранрин, общественный тешкилатар, уьмуьрдин четин шартIариз аватай инсанар фикирдай акъудзавач. Алай йисан сифте кьилелай компанияди 1,5 миллион манатдин мергьяматлувилин куьмекар ганва.
Жасмина Саидова
