Эхиримжи йисара Сулейман-Стальский райондай Россиядин, Европадин, дуьньядин чемпионарни призерар, гьатта Олимпиадайрин къугъунрин са шумуд иштиракчини акъатнава. ТIвар-ван авай спортсменар тербияламишай, и рекье алай вахтундани бегьерлудаказ кIва­лах­завай тренеррикай-муаллимрикай сад КIварчагърин хуьряй тир  Альберт  Межидов  я. Дурумлу ва яргъал йисарин зегьметдай адаз райондин 90 йисан юбилей къейдзавай мярекатдал “Дагъустан Республикадин физический культурадин лайихлу работник” лагьай­ тIвар гана. Шабагьни адав Дагъустан Республикадин Гьукуматдин Председатель Артем Здунова ва адан заместитель Рамазан Жафарова  шад гьалара  вахкана  (шикилда).

А.Межидов гьеле КIварчагърин юкьван школада кIелзавай йисара зирек, викIегь, спортдал рикI алай жаван тир. Районда школьникрин арада тухвай акъажунрани ада са шумуд жуьредай кIвен­кIвечи чкаяр кьунай. 1988-йисуз школа акьалтIарай жегьил Воронеж шегьердин техучилищедик экечIна. Ина кIелзавай, Ленинграддин областда армиядин жергейра къуллугъзавай ва гуьгъуьнлай Воронеждин медучилищеда кIелдай йисарани ам боксдал рикIивай машгъул хьана. Спортдин и жуьредай сифте вердишвилер ада вичин стхаяр тир Нариманавай ва Шагьэмиравай къачуна.

Воронежда кIелдай йисара А. Межидова 2 сеферда и шегьердин, 2 сеферда Воронеждин областдин, Чебоксары, Курск, Воронеж ва  маса шегьерра тухвай Вирироссиядин турнирра чемпионвилин тIварар къачуна. РФ-дин спортдин мастервиле кандидат Альберта, санлай къачурла, рингда 77 женг тухвана, абурукай 69-да гъалибвал къазанмишна.

1999-йисуз, хизандин гьалар себеб яз, хуьруьз хтай А. Межидова боксдин секция (Герейханован ДЮСШ-дин филиал яз) ачухна, КIварчагъ дередин жаванриз боксдай вердишвилер гуз эгечIна.

2001-йисан сентябрдилай Альберта, Кьасумхуьруьн 1-нумрадин  ДЮСШ-дин тренер-муаллим яз, КIварчагъа вичин рикI алай пешедай кIвалахун давамарза­ва. Адан гъилик боксдай вердишвилер къачузвай гадайри республикадин, Вирироссиядин, международный турнирра­ агалкьунар къазанмишзава. Чаз ма­лум­ хьайивал, икьван чIавалди адан гъилик вердишвилер къачур ва устадвал­ хкажай 32 гададикай Дагъустан Республикадин кIвенкIвечивал патал тухвай акъа­жунрин гъалибчиярни призерар, 21-дакай Вирироссиядин турниррин чемпионар, 5-дакай Россиядин Кьиблепатан Фе­деральный округдин гъалибчиярни призерар, 2-дакай Россиядин кIвенкIве­чи­вал патал кьиле фейи акъажунрин чемпионар, 64-дакай Кьиблепатан Да­гъус­тандин зональный акъажунрин гъалибчиярни призерар хьанва.

Альберт Межидован гъилик вердишвилер къачур, чпин устадвал хкажай са шумуд касдикай спортдин маса жуьрейрайни машгьур спортсменар-чемпионар хьанва. ИкI, мисал яз, Камал Межидован­ (боксдай 3 сеферда Дагъустандин, Россиядин Кьиблепатан Федеральный округдин чемпион, РФ-дин кIвенкIвечи­вал патал тухвай акъажунрин гъалибчи), Ра­фик Наврузован (Россиядин спортдин мастер, международный турниррин чемпион), Имран Абдиеван (спортдин мастер, панкратиондай дуьньядин Кубокдин сагьиб, Европадин, кьве сеферда Россиядин чемпион), Агъарза Агъамегьамедован (панкратиондай дуьньядин чемпион), Нуьдуьрмегьамед Алдербегован (панкратиондай Россиядин чемпион, дуьньядин Кубокдин сагьиб) ва масабурун тIварар кьаз жеда.

Алай вахтунда Альберт Межидован гъилик КIварчагъай, Экендилай, НуьцIуь­гъай ва Зизикай тир 40 жаванди боксдай вердишвилер къачузва, чпин устадвал хкажзава.

— Алай йисан октябрдиз КIварчагъа чи халкьдин кьегьал хва Имам Яралиеван хизандин такьатрихъ эцигай спортдин зурба комплекс ачухна, гила ана жа­ванриз боксдал машгъул жедай вири жуьредин шартIар хьанва. Ида чи вилик мадни хъсандиз кIвалахунин, чIехи турнирра мадни еке агалкьунар къазанмишунин везифаяр эцигзава, и кар патал чна чалишмишвални ийида, — лугьуз­ва Альберт Межидова.

Меценат ва общественный деятель Имам Яралиеваз хьиз, Альберт Межидова ва жаван боксерри КIварчагъиз дередин амай хуьрерай жаван спортсменар гъиз-хутахдай машин чара авунай райондин кьил Нариман Абдулмуталибоваз, гьар са карда куьмекар гунай 1-нумрадин ДЮСШ-дин директор Сергей Мирзалиеваз, райондин физкультурадин, спортдин, туризмдин ва жегьилрин крарай комитетдин директор Надир Эфендиеваз чухсагъул лугьузва.

Мадни къейд ийиз кIанзава хьи, мукьвара Альберт Межидов боксдай Кьиблепатан Дагъустандин хкянавай командадин старший тренервиле хкянава. Адахъ къведай йисан февралдиз КIвар­чагъа цIийи спорткомплексда боксдай Кьиблепатан Дагъустандин кIвенкIвечи­вал патал турнир тухудай ният ава.

“Дагъустан Республикадин физический культурадин лайихлу работник” тIвар мубарак авуналди, чаз Альберт Межидовахъ ва адан гъилик вердишвилер къачузвай спортсменрихъ чемпионатрани турнирра мадни еке агалкьунар хьана кIанзава.

Хазран Кьасумов