Эхиримжи йисара спортдин рекьяй дуьньядин дережада кьиле физвай акъажунра кIвенкIвечи чкаяр кьазвай лезгийрин кьадар къвердавай артух жезва. Им вири халкьдик руьгь кутадай кар я.

Мукьвара дуьньядин чемпионрин жергейрик мад са лезги викIегь хва экечIнава — Рустам Ашурбегов. Адан ери-бине Кьурагь райондин КIирийрин хуьряй я. ГъвечIи чIавалай спортдал рикI алаз чIехи хьайи гадади республикадин, уьлкведин, дуьньядин чемпионатра, турнирра гъалибвилер къазанмишнава.

И йикъара Бахрейнда ММА-дай дуьньядин чемпионат тешкилнавай. Иниз жуьреба-жуьре уьлквейрай цIудралди викIегь спортсменар атанвай. Абурун арада чи ватанэгьли Рустам Ашурбеговни авай. Шад жедай кар ам я хьи, Рустамакай 120 кг заланвал авайбурун арада ММА-дай дуьньядин чемпион хьана. Финалда ада Польшадай тир спортсмендин винел гъалибвал къазанмишна. Кьегьал хцин нубатдин агалкьунрал неинки адан тренерри, мукьва-кьилийри, гьакI хайи хуьруьн вири жемятдини дамахзава.

Рустам Ашурбегова алай вахтунда Сургутда машгьур тренер Максим Алимован гъилик вердишвилер къачузва.

Чи мухбир