Алатай саласадиз Махачкъалада, Расул Гьамзатован тIварунихъ галай Милли ктабханадин конференц-залда, “Республикадин милли дамах” проектдин сергьятра аваз, СССР-дин композиторрин Союздин член, РФ-дин искусствойрин лайихлу деятель, РД-дин хейлин шабагьрин сагьиб Мегьамед Азизханович Гьуьсейновахъ галаз гуьруьш кьиле фена. Ана республикадин яратмишунардайбурун, илимдин интеллигенциядин, жемиятдин векилри, студентри, багърийри, адан яратмишунрал рикI алай гзаф ксари — Дагъларин уьлкведин жуьреба-жуьре халкьарин векилри иштиракна.
Мярекатдин тешкилатчи — ктабханадин медениятдин программайрин отделдин кьилин пешекар Ольга Алиевади кIватI хьанвайбур М.Гьуьсейнован таржумагьалдихъ галаз танишарна. Махачкъаладин музучилище, Москвадин культурадин госинститут акьалтIарай ада жуьреба-жуьре йисара Дагъустандин культпросветучилищеда муаллим, Дербент районда аялрин музшколадин директор, ДАССР-дин Гостелерадиокомитетда музыкадин радиопрограммайрин старший редактор ва кьилин редактор, РД-дин культурадин министрдин заместитель, Дагъустандин операдинни балетдин Гостеатрда художественный руководитель яз кIвалахна. Алай вахтунда М.Гьуьсейнов операдинни балетдин Даггостеатрда музыкадин хилен заведующий я. Адан тIварцIихъ хайиди тир Рутул райондин Хъуьлуьдрин хуьре искусствойрин школа гала.
Композитор 200-далай виниз эсеррин автор я.
Милли ктабханадин директордин заместитель Сарат Жабраиловади, “Республикадин милли дамах” проектдин сергьятра аваз, ам кардик кваз алатнавай 3 йисуз библиотекада Дагъларин уьлкведин бажарагълу рухвайрихъни рушарихъ галаз гзаф гуьруьшар кьиле тухванвайди ва нубатдин мярекатдин “тахсиркардин” бажарагъдин кьетIенвал къейдна.
Гуьгъуьнлай мярекат кьиле тухун давамарай искусствовед, РАН-дин ДНЦ-дин Гь.ЦIадасадин тIварунихъ галай ИЯЛИ-дин отделдин заведующий Эльмира Абдуллаевади кIватI хьанвайбур М.Гьуьсейнован яратмишунрин рекьихъ галаз танишарна, адан эсерриз анализ гана.
Гуьруьшдал рахай РД-дин композиторрин Союздин председатель Рамазан Фаталиева, РД-дин музыкантрин Союздин председатель Хан Баширова, РД-дин халкьдин алатрин Госоркестрдин художественный руководитель Новруз Шагьпазова Мегьамед Гьуьсейновахъ галаз таниш хьайи вахтар рикIел хкана, адан эсерриз музыкадин искусстводал рикI алай ксари еке итиж ийизвайди, халкьдин музыкадихъ галаз абурун сих алакъа авайди къейдна, Дагъустандин культура, музыка патал еке зегьмет чIугунай ва и кар давамарунай адаз сагърай лагьана.
Мярекатдин вахтунда кIватI хьанвайбуруз еке экрандилай композитордин эсеррикай (“Шарвили” операдай, “Муьгьуьббатдикай сюита” романсдай кIусар ва мсб.), гьакIни Дагъустандин операдинни балетдин Гостеатрдин оркестрдин солистка Айна Эмировади ва концертмейстер Гуьзел Агьмедовади тамамарай музыкадикай лезет хкуддай мумкинвал хьана.
Милли ктабханадин край чирдайбурун ва милли литературайрин отделди М.Гьуьсейнован эсеррин выставкани тешкилнавай.
Рагнеда Рамалданова
