Дагъустандин властри Самур вацIал гъвечIи ГЭС-ар эцигунин проект уьмуьрдиз куьчуьрмишун пландик кутунва. Проектдин сад лагьай пай кьилиз акъудун яз, кьве плотина авай са ГЭС эцигда. И кардиз серфдай инвестицийрин кьадар 6,6 миллиард манатдив агакьдайвал я, хабар гана, ТАСС-диз интервью гудайла, РД-дин Гьукуматдин Председателдин сад лагьай заместитель Гьажимегьамед Гьуьсейнова.
“Дагъустанда жезвай еке дегишвилерин, республика кIвачел акьалтунин лишан яз, инсанриз регионда еке эцигунрин кIвалахар акуна кIанзава. Чаз гележегда ихьтин эцигунар аквазва — инал ихтилат Самур вацIал гъвечIи ГЭС-ар эцигуникай физва. Алай вахтунда республикади вичихъ гидроэнергетикадин жигьетдай авай мумкинвилер анжах 30 процентдин ишлемишзава. Гьаниз килигна, чна, ракъинин, гарун ва цин энергиядин къуватар сад авуна ишлемишиз, энергетикадин кластер арадал гъун планламишнава”, — лагьана Гь.Гьуьсейнова.
Адан гафаралди, сад лагьай паюна са ГЭС эцигда. Гележегда абурун кьадар 7-дав агакьун (170 МВт-дин гужлувал аваз) мумкин я. “Алай вахтунда чна проектдин вири терефар ахтармишзава, адаз Сбербанкди разивал ганва, финансриз талукь месэла мукьуфдивди ахтармишун давам жезва”, — къейдна ада.
Алай йисан февралдин эхирра республикадин гьукуматди Дагъустандин властри Азербайжандихъ галаз сергьятдал алай Самур вацIал пуд гидрогьалкъа туькIуьрун пландик квайдакай ва гъвечIи генерациядин жигьетдай “РусГидродихъ” галаз санал “рекьерин карта” гьазурнавайдакай хабар ганай. Амма Самур вацIал эцигиз кIанзавай цIийи ГЭС-рин проектар гьелелиг энергетикадин компаниядин инвестицийрин программадик кутунвач.
«Лезги газет»
