ПОДПИСКА — 2018
“Алай вахтунда гзаф инсанри ноутбукрин, смартфонрин куьмекдалди Интернетдай хабарар кIелзава. Амма экуьнахъ таза хабарар авай газет кIелунив завай са затIни гекъигиз жедач.
РикIик зурзун кваз лезги чIалал акъатзавай газетдин нубатдин нумра вилив хуьзвай зун хьтинбур тIимил авач. Генани керчекдиз лагьайтIа, чIехи яшара авай несилдин саки вири векилрикай гьа икI лугьуз жеда”, — къейдзава виликдай военный духтур яз кIвалахай Алияр Жалилова.
Герек са дарман къачуз аптекадиз фейила, ам азад декьикьайра “Лезги газет” кIелиз акунив инсанар фадлай вердиш хьанва. Мегьарамдхуьруьн райондин Бут-Къазмайрин хуьруьн агьали Алияр Жалилова къейдзавайвал, республикада, районда кьиле физвай вири лишанлу вакъиайрикай адаз “Лезги газетдай” хабар жезва.
Инал зи рикIел “Лезги газетдин” кьилин редактор Мегьамед Ибрагьимован гафар хквезва: “Эгер редакциядиз чIехи несилрин векилрин чкадал жегьилар татайтIа, газетдин гележег хаталувилик акатда”.
Амма заз и жигьетдай жуван фикир раижиз кIанзава. Хайи чIаларал акъатзавай изданияр машгьур тахьунин месэладикай рахадайла, шегьердин чка фикирда кьуна кIанзава. Дагълух районра, хуьрера лагьайтIа, милли чIаларал чапзавай газетар гзафбуру кIелзава. Вични 40 йисалай виниз тир яшара авайбуру. Жегьилри лагьайтIа, абурун кьадар тIимил ятIани, чпин районрикай кхьенвай макъалайрин суракьда аваз, газетдин чинриз акъатзавай шикилриз итиж ийизва. Яни чавай акьалтзавай несилди хайи чIалал акъатзавай газет ерли гъиле кьазвач лугьуз жедач.
Районда “Лезги газет” кхьизвайбурун гафарай малум жезвайвал, абур газет электронный къайдада ваъ, почтадай ахгакьарзавай къайдада кIелунив вердиш хьанва. Абуру газетдин гьар са чин, яраб нубатдин чина вуч аватIа лугьуз, рикIик гъалаба кваз ачухзава.
Виликдай военный духтур яз кIвалахай, хейлин инсанар ажалдин къармахрай ахкъудиз куьмекар гайи Алияр Жалиловаз газетдай хайи гафунихъ авай руьгьдин къуват, багъри халкь, чIал, меденият патал кIвалахзавай инсанар, Лезгистандин къамат аквазва. Неинки са гьадаз, гьакI хейлин масабурузни.
Мегьарамдхуьруьн райондин идарайрин, карханайрин регьберри, педагогрин коллективри къейдзавайвал, гьар йисуз райондин “Самурдин сес” ва республикадин “Лезги газет” кхьин абур патал адет хьанва. Чебни, гзафбуру гъалатI яз лугьузвайвал, илитIиз ваъ, хушуналди.
Газет машгьур хьун аниз акъатзавай макъалайрилай, абурун манадилай, еридилай аслу я. Зи хсуси фикир лагьайтIа, ихьтинди я: за газетдин гьар са чин анай хайи райондикай кхьенвай макъала аквадай умудар аваз ачухзава. Им вуч лагьай чIал я? Гьар сеферда газетдин чинал дамахиз ва масабурузни хабар гуз жедай макъала хьуникди арадал къвезвай ватанпересвилин гьиссер? Са шакни алачиз, — эхь! Жуван райондикай кхьенвай макъала садрани чап тийидай газет за ерли кхьизвач. Эгер зи хайи райондикай, хуьрерикай кхьизвачтIа, амай вири хабарар завай маса чешмейрайни кIелиз жезва. И карди, инсанри газет кIелдайвал, абур ашкъиламишдай, руьгьламишдай серенжемар кьабулуникай лугьузвани? Эхь. Газет кIелзавайбур руьгьламишдай, абуруз ашкъи гъидай рекьер гзаф ава. Журналистри чпин кIвалахда и кардиз фикир гун лазим я.
Статистикади тестикьарзавайвал, Мегьарамдхуьруьн районда “Лезги газет” кхьизвайбурун кьадар йисалай-суз артух жезва. Им, са шакни алачиз, дамахиз жедай кар я!
* * *
Редакциядин патай
Гьакъикъатдани, Мегьарамдхуьруьн район 2017-йисуз, “Лезги газет” кхиьзвайбурун кьадардал гьалтайла, сад лагьай чкадал ала. И райондай, лезги маса районрай хьиз, газетдин редакциядихъ галаз алакъаяр хуьзвай амадагарни ава. Чна абуруз и алакъаяр мадни сихбур авуниз, чкайрилай итижлу, метлеблу макъалаяр рекье туниз эвер гузва. Хайи чIалав къайгъударвилелди эгечIзавай, адан къадир авай гьар са кас “Лезги газетдин” редакциядиз багьа я. Чна 2018-йисуз абурун кьадар мадни артух жедайдак умуд кутазва. “Лезги газетдин” дустариз-даяхриз баркалла!
Гуьлмира Закуева
