Чи ватанэгьлияр — гьар сана
Пешедин рекьяй математикар, физикар яз, яратмишунин рехъни агалкьунралди давамарзавай бажарагълу ксар гзаф халкьарин эдебиятра малум я. Алай вахтунда Сургутда яшамиш жезвай чи ватанэгьли Мирим Агъакеримович Жалиловни шаирвилин алакьунар авай физик-математик я.
Ам 1962-йисуз Сулейман-Стальский райондин Испикрин хуьре лежбердин хизанда дидедиз хьана. Хуьре мектеб акьалтIарайдалай кьулухъ 1980-1985-йисара ада ДГПУ-да физикадинни математикадин факультетда кIелна. Яру дипломдалди вуз акьалтIарай жегьил пешекарди зегьметдин рехъ 1985-йисалай Хив райондин мектебра тарсар гунилай гатIунна. 1991-2004-йисара ада Махачкъала шегьердин ва гуьгъуьнлай Испикрин мектебра тарсар гана.
2004-йисуз кьисметди Сургут шегьердиз акъудай бажарагълу муаллим гьанани вичин пешедивай яргъаз хьанач. Са йисуз мектебда муаллимвилин кIвалах давамарайдалай кьулухъ Мирим Агъакеримовича аспирантура куьтягьна. Дуьм-дуьз илимрин сирер дериндай чирай пешекар-муаллим Сургутдин гьукуматдин университетдиз физикадин муаллимвиле кIвалахал кьабулна. ИкI, алакьунар авай ватанэгьлиди 2005-йисалай СурГУ-да студентриз физикадай чирвилер гузва.
Винидихъ къейд авурвал, Мирим муаллим шаирни я. Малум хьайивал, лезги ва урус чIаларал шиирар теснифунал ам гьеле 6-классда кIелзавай чIавалай машгъул я. Адан шииратда муьгьуьббатдин темади ва философиядин лирикади кьетIен чка кьазва.
“КIанивилин ялавар” сад лагьай ктаб 2000-йисуз — Дербентда, “Са гъед” тIвар алай ктаб 2016-йисуз Кьасумхуьрел чапдай акъатна. Алай вахтунда адан яратмишунрин “никIе” мад са ктабдин “бегьер” кIватI хьанва. Идалайни гъейри, урус чIалал акъудун патални са ктабдин материал гьазур я.
Мирим Жалилова вичин уьмуьрдин юлдашдихъ галаз санал пуд велед чIехи авуна, абуруз кьилин образование гана. ЧIехи руша ДГПУ-дин филологиядин ва СурГУ-дин экономикадин факультетар куьтягьнава. Кьвед лагьай руша Сургутда мединститут куьтягьна, духтур-невролог яз кIвалахзава. Гададини СурГУ-дин юридический факультет куьтягьнава. Къуй Мирим Жалилован хизанда хушбахтлувал, гьар са карда агалкьунар хьурай!
К.Ферзалиев
