Квез чидани?
Шикилдай аквазвайди тенрекрин жинсиникай тир цIару тенрек я. Нек хъвадай гьайванрик акатзавай и вагьши анжах Мадагаскарда гьалтзава. Адан яргъивал 16 сантиметр, заланвални 80-280 грамм кьван жеда. Адан беден хци цацари кьунва. Гьавиляй ам кьуьгъуьрдиз гзаф ухшар я. Ранг чIулав ва шабалтдинди тирвиляй адаз цIару тенрек лугьузва. Адет яз, и жуьредин тенрекар кьеж квай тамара, тарар авай чкайра яшамиш жеда. Абуру гьарда вичиз чилик тIеквен эгъуьнзава. Бязи вахтара абур гзафбур санал яшамиш жеда, тIеквенриз фидай рекьерин яргъивални са шумуд метрдив агакьда. Гьайван гагь-гагь тараризни акьахда. ХъуьтIуьн вахтунда абур члада авай гьалда жеда.
Набататрин дувулрикай, пешерин кIаникай жагъуриз, тIуьнин еринда тенрекди гзафни-гзаф шарар ишлемишзава. Ам тахминан 3 йисуз яшамиш жезва.
«Лезги газет»
