И йикъара “Дагъустан” ГТРК-дин лезги чIалал телерадиовещанидин чIехи редактор Наира Рамазановади ДГУ-дин биологиядин факультетдин профессор, вичин ери-бине Ахцегь райондин Луткунрин хуьряй тир Нисред Къадировичанни и райондин Ухулрин хуьряй тир Заира Исаевнадин (Къличхановрин) хва Къадира спортдин рекье нубатдин агалкьун къазанмишнавайдакай хабар гана.
Къадир Къличханов ( 21 йис) грэпплингдай дуьньядин чемпион, какахьай женгерай Дагъустандин, Россиядин чемпион я. Панкратиондайни Дагъустандин чемпионвилин тIвар къачунва. Самбодай кьиле фейи Дагъустандин чемпионатда ам приздин сагьиб хьана. Дагъви пагьливанди грэпплингдай, панкратиондай жуьреба-жуьре кIвенкIвечивилин акъажунра, турнирра гъалибвилер къазанмишнава.
Къадира алай йисуз ДГУ-да математикадинни компьютеррин илимдин факультет куьтягьна. Спортсменди гьевескарвилин женгера гьеле 14 йисан яшда авай чIавалай иштиракиз хьана.
Алатай йисалай ам машгьур “Dagestan Faighter” клубдин ММА-дин спортсмен я. Пешекарвилин дережада кьиле тухвай кьве бягьсинани ада гъалибвал къачунва. Абурукай сад — FCA-дин (вири дуьньядин женгерин лига) акъажунар октябрдин эхирра Дербентда кьиле фенай.
Спортсмендихъ гележегда UАС-дик экечIунин ва чемпионвилин чIул къазанмишунин мурад ава. Къуй адахъ и регьят тушир рекье агалкьунар хьурай!
К.Ферзалиев
