И мукьвара Дербентда Израилдин Хадера шегьердин мэрдин заместитель Натан Ливиев мугьманвиле хьана ва ам шегьердин кьил Хизри Абакарова кьабулна. Дуствилин гьалара кьиле фейи и гуьруьшдал Н.Ливиева Хадерада спортдин машгьур жуьрейрикай сад тир дзюдодай международный турнир кьиле тухудайдакай ва ана иштиракун патал стха шегьер тир Дербентдин спортсменризни теклифнавайдакай хабар гана. Израилдай тир мугьманди турнирди кьве уьлкведин спортсменрин арада авай дуствал ва стхавал мадни мягькемардайди къейдна.
Н.Ливиева турнирда иштиракунин вири харжияр Хадера шегьердин муниципалитетди вичин хивез къачузвайдини раижна.
Гуьруьшдал рахай къадим шегьердин кьил Хизри Абакарова вичин нубатдай яз турнирдиз Дербентдин спортсменриз теклифунай мугьмандиз сагърай лагьана. Дербентда, чи уьлкведа хьиз, международный турнирра, чемпионатра ва кIвенкIвечивал патал акъажунрани агалкьунралди иштиракдай, гъалибвилер къазанмишдай дзюдоистар авайди къейдна.
РикIел хкин: Дербент ва Хадера шегьеррин арада стхавилин алакъайрин икьрар 2006-йисуз кутIунна.
Нариман Къарибов
