Мегьарамдхуьруьн районда, аскер-интернационалист, Советрин Союздин Игит Абас Исрафилован экуь къамат рикIел хуьнин лишан яз, 2000-2003-йисара дидедиз хьайи жаванрин арада азаддаказ кьуршахар кьунай республикадин дережадин турнир кьиле фена. Ам Халкьарин садвилин йикъаз талукьарнавай. Къейд авун лазим я хьи, гьар йисуз кьиле тухузвай республикадин дережадин турнир районда терроризмдин идеологиядиз аксивал къалуруниз талукь Комплексный Пландин сергьятра аваз, гьакIни “Сад тир Россия” ВПП-дин къаюмвилик кваз уьмуьрдиз кечирмишзава.

ИкI, ноябрдин сифтегьан пуд юкъуз Дагъустандин гьар са пипIяй атанвай 200-далай виниз жаванри спортдин майдандал чпин устадвал, гьу­на­рар къа­лурна. 3-ноябрдиз спортдин акъажунар ачухуниз ва гъалибчийрив шабагьар вахкуниз талукьарнавай шад мярекат кьиле фена. Ана Мегьа­рамд­хуьруьн райондин кьил Фарид Агьмедова, гьакI мугь­манри — РД-дин физический культурадин ва спортдин министерстводин управленидин начальник  Халидбег Махачева, тренерри, спортсменри, райондин хуьрерин кьилери, тешкилатрин ва чирвилер гудай идарайрин векилри, спортдал рикI алай гзаф ксари  иштиракна.

Эхиримжи йисара турнир районда Мегьарамд­хуьруьн кьилин призар патал дзюдодай кьиле тухузвай Дагъустандин кIвенкIвечивилихъ галаз са­нал­ спортдин еке мярекатдиз элкъвенва. Турнир­дин­­­ иштиракчийрин, мугьманрин, гьа гьисабдай яз и тур­нирдин тешкилатчийрикай сад тир респуб­ли­ка­дин физический культурадин ва спортдин ми­ни­с­­тер­ст­водизни Фарид Агьмедова сагърай лагьа­на.

— Советрин Союздин Игит Абас Исрафилован экуь къамат рикIел хуьнин лишан яз кьиле тухуз­вай­ и турнир хъсан адетдиз ва спортдин зурба су­­вариз элкъвенва. Ина республикадин жуьреба-жуьре пипIерай атанвай ва чкадин спортсменри гьасиррал чпин алакьунар, викIегьвал, зиреквал къалурзава. Сагълам уьмуьр раиж авунихъ галаз санал жегьилар  ватанпересвилин руьгьдаллаз чIехи авунихъни еке важиблувал ава. Спортдин мярекатда гьар йисуз ветеранри-десантникрини иштиракуни акьалтзавай несилдиз жуван чешнедалди дурумлувилин, Ватандиз вафалувилин,  адан тарих рикIелай алуд тавунин, женгинин дуст­вилин ерияр чирзава, — къейдна райондин кьили.

Ф.Агьмедова турнирдин иштиракчийрихъ спортдин мадни еке кукIушар муьтIуьгъардай къуватар хьун алхишна, спорт неинки беден, гьакIни руьгь лигимарзавай къуват тирдални фикир желб­на. Шад мярекатдал рахай амай ксарини спортсменрихъ агалкьунар хьана кIанивилин келимаяр, чи ватандаш Игитдин гьуьрметдай гьар йисуз спортдин акъажунар кьиле тухунай Фарид Агьме­доваз сагърай лагьана.

«Лезги газет»