Алатай вацра Дондал алай Ростовда, Россиядин лайихлу тренер Сурен Казарован экуь къаматдиз бахшна, азаддаказ кьуршахар кьунай Вирироссиядин акъажунар кьиле фена. И турнирдин кьетIенвал ам я хьи, кIвенкIвечи чкаяр кьурбуруз спортдин мастервилин тIвар гузва. Кесерлу и турнирда цIи 200-далай виниз спортсменри чпин гьунарар къалурна. Шадвилелди мадни а кардикай хабар гуз кIанзава хьи, и акъажунра вичин ери-бине Ахцегь райондин Къучагърин хуьряй тир Камил Мамедгьуьсейновани иштиракна. Ам 3 сеферда гьасиррал экъечIна, 57 кг-дин заланвал авай спортсменрин арада чи ватандашди 1-чка кьуна, спортдин мастервилин тIвар къачуна. Адаз Ростовдин областдин физический культурадин ва спортдин рекьяй министрди къизилдин медаль, 1-дережадин диплом ва къиметлу пишкешар гана.
К.Мамедгьуьсейнов 1996-йисуз Махачкъалада дидедиз хьана. Алай вахтунда ада Даггосуниверситетдин юридический факультетдин 4-курсуна кIелзава. 4-класс акьалтIарайдалай инихъ къенин йикъалди ада (сад лагьай тренер — Зейнал Жамалов) Махачкъалада, Дондал алай Ростовда азаддаказ кьуршахар кьунин сирер чирзава.
Спортдал машгъул жезвай йисара ада кIвенкIвечи чкаяр садрани-кьведра къазанмишнач. Сифтегьанбурун жергедай яз Махачкъала шегьердин спортдин, туризмдин ва жегьилрин крарин рекьяй комитетди тешкилай акъажунра (28 ва 32 кг-дин заланвал авайбурун арада), Али Алиеван тIварунихъ галай спорткомплексда 1995-1996, гуьгъуьнлай 1996-1998-йисара дидедиз хьайи аялрин арада Махачкъала шегьердин кIенкIвечивал, Олимпиададин къугъунрин ва дуьньядин чемпионар тир стхаяр Жабраиловрин призар патал акъажунра (42 кг-дин заланвал авайбурун арада), Дондал алай Ростовда Кеферпатан Кавказдин студентрин арада кьиле фейи олимпиадада (57 кг-дин заланвал авайбурун арада) ва икI мад турнирра 1-чкаяр кьуна.
Нубатдин агалкьун къазанмишуни чи ватандашдиз 2020-йисара зонайрин арада, гьакIни Ростовдин областда кьиле фидай Россиядин чемпионатда иштиракдай мумкинвал гузва. Чи мурад Камилахъ спортда ва уьмуьрда мадни еке агалкьунар хьун я!
Агьмед Агьмедагъаев,
хуьруьн майишатдин илимрин кандидат
