5-ноябрдиз Дагъустандин Кьил Владимир Васильеван регьбервилик кваз тухвай нубатдин совещанидал республикада чимивал гудай сезон башламишуниз талукь месэла веревирдна.
РД-дин Гьукуматдин Председателдин заместитель Владимир Лемешкоди къейд авурвал, талукь тир министерствойри чимивал гудай сезондиз гатун девирда гьазурвилер акуна. Адан гафаралди, шегьеррин 10 округдикай 8 округди гьазурлухвилин паспортар къачунва, мукьвал тир вахтара мад кьве округдив ахьтин паспортар агакьда. Гьа са вахтунда чпив лап мукьуфдивди эгечIун истемишзавай кьетIен гьалар арадал атунин къурхулувилер амазма.
“Газдин ва электричестводин сетрин иесисуз объектар хсусиятдиз ягъунин кIвалах кьиле тухудай девирда муниципальный тешкилатрихъ ва а сетар ишлемишзавай организацийрихъ галаз алакъада аваз аварийрин вилик пад кьунин рекьяй икьрар кутIунун фикирдиз къачунва. А икьрардал асаслу яз, сетар ишлемишзавай организацийри аварияр арадай акъудда, муниципальный тешкилатди лагьайтIа, и кардиз акъатай харжияр арадал хкида. Гьеле йисан сифте кьилера гьавадин къулайсуз шартIарин нетижада иесисуз, къайдадикай хкатнавай объектар гьибур ятIа тайинарайдалай гуьгъуьниз абур ремонт авун патал аварийрин вилик пад кьадай икьраррин сергьятра аваз куь тапшуругъдалди республикадин бюджетдай пул чара авунай”, — лагьана, кьилди къачуртIа, Владимир Лемешкоди.
Махачкъаладин мэр Салман Дадаева малумарайвал, мумкин тир четинвилер арадай акъудун патал гьеле 31-октябрдиз махсус штаб тешкилна.
“Идалайни гъейри, сентябрдилай шегьердин марфарин ятар къерехдихъ алуддай канализациядин къурулушар михьи авунин ва абурал зирзибил кьадай тадаракар эцигунин кIвалахар тухвана. Марф къвайи сифтегьан юкъуз гьалар къайдадик квай, амма 2-ноябрдиз, са юкъуз вацран норма марфар къвайидалай гуьгъуьниз, Махачкъаладин 20-далай виниз куьчеяр цик акатна. 2-ноябрдиз чна зирзибил кьадай тадаракар гъиле-гъилди михьи авуна ва йикъан сятдин 3-даз яд къерехдихъ алудиз алакьна”.
Шегьердин мэрдин рахунриз баян гайи Дагъустандин Кьили махсус штаб виликамаз тешкилуниз хъсан къимет гана.
“Заз вири муниципалитетрин кьилери кIвалах гьа икI тешкилун лазим тирди рикIел хвена кIанзава. Идалайни гъейри, жуьреба-жуьре шартIар арадал атун мумкин тирди фикирда кьуналди, и ва я маса хиляй пешекаррихъ галаз виликамаз меслятар авурдалай гуьгъуьниз къуватар ва такьатар гъилик авун герек я. Пешекарри кьетIен гьалар арадал атунин вилик пад кьун ва я ахьтин гьалари арадал гъун мумкин тир татугайвилерин кьадар жезмай кьван тIимиларун патал вуч авун лазим ятIа, лугьуда”, — меслят къалурна В.Васильева.
Эхирдай Махачкъаладин мэрди чимивал гудай сезон вахтундилай вилик башламишнавайдан гьакъиндай малумарна: “Гьавадин шартIар чIур хьунихъ галаз алакъалу яз оперативный штабдин заседанидал чимивал планламишнавай 12-ноябрдилай ваъ, гьеле 1-ноябрдилай башламишунин къарар кьабулна. Гьа и юкъуз аялрин бахчайрив чимивал агакьна. Къе и сиягьдик мектебар ва медицинадин идараярни акатда. Идалайни гъейри, къе гзаф квартирайрикай ибарат кIвалеризни чимивал гунив эгечIда. 8-ноябрдалди чимивал вири кIвалерив агакьардайвал я”.
«Лезги газет»
