Мергьяматлувал
Элликлух (общественный) чкаяр абадуник, халкьдин важиблу крар вилик тухуник чпин хушуналди кьил кутазвай ватанэгьлияр, кьилдин тешкилатар тIимил авач. Шадвилелди къейд ийиз жеда хьи, мумкинвилер авайбуру и ва я маса кардиз къаюмвал авунин, такьатар серфунин везифаяр чпин хивез къачузва.
Лугьуда хьи, вири халкь патал ийизвай мергьяматлувилин крар несилрин рикIера асирралди амукьда. Сулейман-Стальский районда яшайишдин метлеб авай крариз, агьалийрин дуланажагъ патал къулайвилер тешкилуниз фикир гузвай тешкилатрикай сад “Минералар квай ятарин “Рычал-су” завод ОАО я.
Сулейман-Стальский райондин администрациядин пресс-къуллугъди хабар гузвайвал, а заводди район абадуник кутазвай пай кьетIенди я. И мукьварани, мергьяматлувилин серенжем яз, заводди райондин хуьрерин са жерге куьчейра къир цана, КIварчагърин хуьруьз хъвадай цин турбаяр тухвана.
Заводдин кьиле авайбуру Дагъустандин халкьдин шаир СтIал Сулейманан кIвал-музей гуьнгуьна хтунин кардани чIехи жумартвал къалурна. Идалайни гъейри, карханади образованидин, медениятдин, спортдин ва жегьилрин жуьреба-жуьре мярекатрикни, гьа жергедай яз гьар йисуз хайи чIалан месэлайриз талукьарна кьиле тухузвай илимдинни тежрибадин конференциядикни, “Куьредин ярар” фестивалдикни, КВН-дикни пай кутазва; дарда авайбурун гъилни кьазва.
РД-дин Кьил В.Васильева теклифай “100 мектеб” проект кьилиз акъудунин сергьятра аваз, ДаркIуш-Къазмайрин, Шихидхуьруьн мектебрин дараматар цIийи хъувунин кIвалахризни заводди такьатар чара авуна.
Аквазвайвал, карханадин кьилевайбурун къаюмвилин куьмек себеб яз, агьалийрин яшайишдиз талукь кар алай объектрин, мектебрин месэлаяр гьялиз алакьнава.
Инал чна къейднавай кIвалахрик, тестикьарзавайвал, заводдин мергьяматлувилин вири серенжемар акатзавач, кьилиз акъуднавай ва фикирдик квай крарин кьадар мадни гзаф я.
«Лезги газет»
